ciliemeso e sincera deziro faciligar sa adopto da la esperantistaro, — ke ca nomo esis komprenata en altra senco da kelka esperantisti, qui aparas ofensita, ne vidante ke reale ol esas komplimento por la bela laboro di Zamenhof e di sa adheranti. Se ni esus nomizinta la linguo exemple « Idiomo Neutrala Plubonigita », me ne dubas ke la adheranti di Idiom Neutral konsiderus to quale komplimento ofrita da ni a li. Sed multa esperantisti ne vidas, o ne volas vidar, ke elektante lia linguo quale bazo di nia e baptante ol kun vereso Esperanto Simpligita, ni volas dicar a la mondo quanto ni debas, praktike e teorie, ad Esperanto ed a la movado e movanteso di la Esperantistaro.
Altraflanke on devas konfesar ke quale kontrasto ye Esperanto Simpligita la nomo Esperanto Primitiva (EP.) ne esas tre bone elektita, pro ke povas aparar quale se ol kontenus ula nuanco di malaprobo o di malestimo absoluta. Me kredas parolar ne sole ye mea personala nomo dicante ke omni — mem kande ni kritikas la linguo di Zamenhof e di sa Fundamento — ni respektegas ol; nia malaprobo esas nur relativa e partala. Ol superesas grandege omna ta propozi di lingui internaciona qui naskis ante 1887, e tre granda nombro de ti qui naskis pos 1887; e ni ne povas ne admirar la instinta sekureso, per qua Zamenhof evitis preske omna grava difekti di la altra sistemi. Se do ni parolas pri Esperanto Primitiva, ni volas nur substrekizar la opiniono, ke anke ca konstrukturo relative perfekta havas kelka difekti, quin la energioza labori di la lasta dek yari montris sat klare por ke ni kredas ke la tempo nun venis remedyar li. Ni esas konvinkita ke, se ni povus imaginar la neposibla situo, ke Do Zamenhof povus nun komencar la laboro di sa yuneso, richigita per la sperienci quin il nun posedas, e libera ye omno to quo ligas il nun a la formo malnuva di sa linguo, lor il kreus sendube linguo tre similesanta ta quan ni rekomendas. Suficas por konvinkesar pri co, konsiderar la propozi di chanji quan il ipsa facis en 1894, en 1906, ed en la komenco di 1908, propozi quin mal-
