felice sa adheranti facis omno por supresar, ne diskutante li mem, e qui montras ye la maniero la max honorizanta ke il ne pensas ke sa linguo « primitiva » ne povas o ne devas plubonijar.
Eskartante do la nomo Esperanto Simpligita, ni povas unesme traktar la du nomi propozita a la Konstanta Komisitaro da sa prezidanto, So Ostwald : Progresanto e Prosperanto. Ca nomi rimifas kun Esperanto ec tamaniere montras quaze simbole la relati qui existas inter la du lingui. Li esas plu logikala, quale nomo di linguo, kam la nomo Esperanto, la aplikeso di qua a linguo esas reale kontre la spirito di la linguo ipsa. « Progresanto » pensigas ye la nomo di ca revuo ed anke la qualeso esencala di nia linguo, ke ni deziras nule e nultempe igar ol tante fixa, ke ol ne povus progresar kun la altra progresanta institucuri di la homaro. Malgre ca sugestiveso di la nomo Progresanto e la tute simila sugestiveso di la nomo Prosperanto, me ne povus volar por li, pro ke li esas o povus en la okuli di kontruli semblar esar poke fanfarona od ostentema. Altra argumento kontre li esas ke li povas esar en kelka kombini dusenca : on povas dicar, exemple, ke la angla linguo esas progresanta o prosperanta en Sud-Afriko, o ke la ministro N. parolis prosperante en ta o ca okaziono, edc.
Simila dusenci neposibligas anke altra nomi ye qui on povus unmomente pensar, exemple Universalo, Europano, Helpa Linguo, Linguo Komuna, Tutmondo, edc. Kelki ek ica nomi uzesas anke pri altri propozi di linguo internaciona
So de Beaufront propozis la nomo Auxiliaro, qua havas la avantajo ne trovesar en la linguo quale vorto komuna e qua konseque ne povas produktar dusenco; nam la dusenco qua existeskas, kande on volas parolar en la gramatiko pri verbo auxiliara, ne esas grava. Ca nomo esas sugestiva ye la rolo helpanta quan la linguo internaciona esas destinata ludor. Tamen me ne kredas ke Auxiliaro esas sat bona por nia skopo : ol esas tro erudita e nepopulara. La popull germanika tute
