esas tala gigantolaboro, ke ol ne povas quik ekirar tute pronta ek la laboreyo di un individuo, sed bezonas la kunlaborado di multa pensanta kapi, til ke ol divenos, quo ol devas esar : obedyema instrumento, qua povas servar a l’expreso di omna homal penso, sen ke on devas sempre luktar kontre manki e perifrazi, quale eventas tante ofte, rigretinde, en la tilnuna lingui.
Segun la programo di la Komitato (Progreso, p. 5) devas omna amiki di la divenanta helpanta linguo kunlaborar a sa konstrukto, ed en ta penso me volus propozar, ke la decidi di la Komitato pri la nuva linguo esez publikigata (precipue en Progreso) e komence konsiderata nur quale provizora. Omnu, qua havas ulo dicenda pri to, devas expresar sa opiniono, sive simpla kritiko, sive anke pozitiva propozo di chanjo, en letro ad la Komitato; ca letri devas esar examenata da la Komitato, e, se una od altra semblas meritar repetita diskuto, ol devas esar publikigata en ica revuo. Sur la bazo di omna tala letri la Komitato povus lor facar sa definitiva decidi e konocigar li da la publiko. Me insistas, ke me ne propozas quaze generala voto. La lektanti di la revuo o di la provizora gramatiko devas havar nur konsultala voco; sed me pensas, ke esas dezirinda por la Komitato ipsa, konocar omna motivi, qui parolas por o kontre determinita aranjo, ek qui forsan kelki povis eskapar sa atenco.
En ca penso me permisas a me cadie prizentar a la Komitato kelka rimarki pri la materyo publikigita en la texto di ca revuo ed en sa suplemento, lasante ad ol decidar, kad ol volas li publikigar por generala judiko. Altri povos sequar mea exemplo e sendar lia rimarki.
Duesma propozo de me konsistas en co, institucar en la revuo « letrobuxo », en qua on respondos a questioni pri gramatiko, sintaxo e vortaro, segun quante li havos generala intereso.
Per ta du institucuri on konservus, per mediato di la revuo, konstanta ligo inter la Komitato e la publiko, qua povus nur utilesar a la afero.
Fine me propozas ankore, ke omnu, qua pozas tala questiono, samtempe sendez malgranda suskripto (ex. 50 centimi, c. e. du internaciona postal respondo-kuponi) por la Komitato, por augmentar sa financi.
Por donar quik bona exemplo, me prizentas cadie a la redaktistaro di Progreso kelka questioni, lasante ol decidar,
