Ye fino di februaro aparis : A. Kofman : Lernolibro (rusa) di la linguo internaciona Ido, en 10 lecioni (editata da Unde‑ Popov, Armavir (Rusio) ; preco : 20 kopek).
Ye fino di februaro aparis : Finna Guidlibreto, konforma a nia cetera guidlibreti, sed plu ampla, pro la manko di mult internaciona vorti en finna (42 pagini). Helsinki (Helsingfors), Osakeyhtio Kauppakirjapaino, 1910. Preco : 25 centimi.
Ni memorigas da nia lektanti, ke la sola oficiala insigno di l’Uniono vendesas da la sekretaryo, po la fabrikopreco, nome : singla peco, 35 centimi, plus 10 centimi por posto ; 10 kune, fr. 3.85 rekomendita.
So Waltisbühl fabrikigis propagala kuverti kun texto en Ido, D. E. F. I. S., Nederlandana e Suedana, quin il vendas : 100 po fr. 1.50 ; 500 po fr. 6 ; e 1000 po fr. 10. Anke propagala postkarti, kun la sama texto nur en Ido, e la titolo : Uniono e c. ; preco : 100 po fr. 1,25.
So G. Adolf Larsson, Ostermalmsgatan 65, Stockholm (Suedo), qua preparas adapto di la suedana stenografo (sistemo Melin) ad Ido, deziras savar, kad existas irga explori pri la frequeso di idala vorti, e korespondar kun ti, qui konocas tala tabeli o qui volas kontar la vorti en diversa texti idala.
Avizo. — Ni ricevas prospekto quar-pagina titolizita Adjuvilo, anuncanta nuva L.I. qua pretendas esar plubonigo di Ido, sed esas reale nur sa karikaturo. Ta prospekto portas nula subskribo, e la falsa indiko : « Imp. de l’Adjuvilo ». On rekonocas facile la tipi di ula Esperantista imprimeyo, e la stilo di la max « honesta » Esperantista revuo. To esas do nur nuva ruzo o jokacho di nia malsincera adversi por trublar l’Idisti ; sed ol trompos nulu de nia samideani. Ol augmentos nur la malestimo, quan li havas de longe por ta kompatinda siori. Sed quala konfeso di lia desperala situeso ! Li neplu povas defensar rekte, loyale, Esperanto : e por kombatar Ido li kredas su obligata (!) imaginar altra sistemo, qua diferas de Esperanto plu multe kam Ido : li laudas… omna avantaji di Ido, qui mankas ad Esperanto, e mem li ne timas kritikar punti, qui esas komuna ad Esp. ed Ido. Li do agnoskas la supereso di Ido, pro ke li povas kombatar ol nur per sa propra « armi » ed argumenti !
Le gérant : L. Couturat.
PARIS. — IMPRIMERIE CHAIX (SUCCURSALE B), 11, BOULEVARD SAINT-MICHEL. — 771-10.
