Do thoitim fria Cū
ba dirsan, a lōeg!
nīr anacht do scīath,[1]
nobīd lat fria feidm.
Ar comracc im(?) tor˘,
ar maircc as ar ndeilm,
ba cāin in scāl mōr;
nobristi ar cach slūag,
nocurthea fo thrāig,
dursan a eō ōir.
A Fir Diad. ⁊ idem.
Cluithe[2] cāch, cāine cāch
co Fer Diad isind āth:
dursan ūaitne ōir
forfuirmedh for āth.[3]
Cluichi cāch, cāine cāch
co Fer Diad isind āth:
indar limsa Fer dil Diad
is am dīaid nobīad co brāth.”
[40a] Intan trā bātar an tslūaig oc techt ō Āth Fir Diad sades, bōi Cūchulaind ina otharligiu andside conatatānicc ria cāch Senoll hŪathach, combāiside ⁊ dā mac Fice dolotatar la Coinchulaind for cūlaib ailli do īcc ⁊ būalad a crēcht do uscib Conailli.
Ithē a nanmandasid[4]: Sas, Būan, Bithslān, Finnglas, Gleōir, Bedc, Tadcc, Talam ed, Rindd, Bir, Brenide, Cumang, Cellend, Gænemain, Dichu (?), Muach, Miliucc, Den, Delt, Dubglaise. Cēine doluid Cūchulaind iarum dia būalad asna huscibsin, lotar an slūaig secha fodes congabsatt dūnad a nImorach Smiromrach. Dolluidi Mac Roth ōn tslōg fodes do frecomot ar hUltaid, combāi i Slēibh Fōit, dūss ind faicfed nech ina ndīaid. Isbertside friu nānfaca acht ōencharpat.[5]
