[41a] Dinda na Tāna so sīs .i. Caladgleo Cethirn maic Findtain, Fīacalgleō Fintain, Rūadruca Mind, Bāngleo Rochada, Mellgleo Iliach, Airicar narad, Aisling nAimirgin, Sīrrabad Sūaltaim, Tochestul nUlad, Aislingi Dubthaich, Aislingthi Conlongais, Toichim na mbuiden, Gleoud in chatha, Damgal na tarb, Aus in Duib Cūalngni for tāin.
Caladgleo Cethirn inso a fec[h]tsa.[1] "Atchīusa carpat tarsin mag antūaid indiu," or Mac Roth, "⁊ fer findlīath cen gaisced acht ōendelc nargaid ina lāim; indar lat is denn cēttamun fil forsin carput. Is cuma congoin in [n]araid ⁊ inna heocho. Ised hed lais nīcon tair in slōg i mbethaid. Milchū alath rīam." "Cia sin? a Fergais!" bar Ailill, "in dōig bad ē Conchobur nō Celtchair?" "Nāch dōich," ol Fergus, "dōig lim immorro rombad hē Cethern mac fīal fōebuirderg[2] Fintain,[3]" ⁊ ba fīr sōn didiu. Fosnobairside iarum tresin dūnad ⁊ gontaiseom sochaidi ⁊ gontarsom co mōr, colluid cona inathar ima chosa dochum Conchulaind triasin cath. Arceisi de a guin. "Cuinnig liaig damsa," ol Cethern fri Coinchulaind. Dognīthi cosair ūrlōchra dō ⁊ frithadart fris. Is and fōidis Cūchulaind Lōeg ūad isin duibdūnad co Fīacha mac Firfebe do chuindchid legi ⁊ asbert nosmairfedsom uile cid fo thalmain nobetis isin dūnad, mani rīastais chucaisom do c[h]omchisin Cethirn. Nīrbo rēid lasna leigi annī sin, ar nī bāi isin dūnad nāchidrubadsom. Tēgit as tra na leigi dia indsaigid. Danēici iarum in cētna liaig donēnic. "Nīcon bīa a mbethaid," or seiside. "Nīcon bīaso didiu it bethaid," ol Cethern. Beantai dia durn co tuilid a inchind fora chlūasaib. Marbaid cōecait leigi diib fon indus sin nō marbaid cōic ḟiru dēac dīb amin. In fer deidenach nīndrānic acht ind mbēimme conidcorastair im-mūaidhi.[4] Anachtaiside la[5] Co[i]nculaind iarum. Tīagar ūaidib co Fingin fāithliaig .i. liaig Conchobuir co tīsad do choimchisin Conculaind ⁊ Cethirn.[6] "Ní maith dait," or Cūchulaind fri Ccthern, "na leigi da marbad. Nī fuigēbthar foro tuidecht cucut itir." "Nī maith dōibsom didiu epert ind uilc frimsa," air ised adbered cach liaig dīb adofēchad[7] nā bad beō ⁊ nā bad indlego itir, conid īarsin nambennadsom[8] cona durn. Conacadarsom in carpat
