benaidh in claideb trīt co luid a dornn trīt i ndeadaid[1] in c[h]laidib. Is de atā Liaa toll i Crīch Rois. "Is brēg anīsa tra," orsē; "nīcon aniubsa dīb[2] ēm," for sē, "conidnacor for duine in mindse Ailella." Is iarum conmelt foroib laithiu conaithiu[3] corgaibib[4] Mane fora chend in mind ⁊ fosfōbair ina charput remi. Focherd didiu a scīath ina diaid conid rorand cona araid ⁊ co lluid triasna heocho hi talmain. Roīadh[5] in slōg imbisom iarum, conmeltsom didiu foraib, co torchair eturru amlaid.
Fīacalgleo Findtain so sīs.
Is iarum dolluid Findtan do dīgail a maic foraib trī cōecait[6] fer nimrind dō, dā gæ for cach crunn leu ⁊ fochroisse impu. Dobersidi secht cathu dōib connā tērno nech dia muinter acht hēseom fesin ⁊ a mac. Is iarum etarscartharside frisom fon amdabaid scīath ⁊ anachta la hAilill ara omunson ⁊ ar nāchnimbred foraib co tīsad la Conc[h]obar don chath. Dobertsom cairdi friusom iarum ar telcod a maic dō.
Rūadrucca Mind annso sīs.
Dolluid Mend mac Salchada chucu iarum, tricha fer nimrind dō; docer la Meidb[7] iarum dā fer dēac dīibsom ⁊ dā fer dēc dia muintersom didiu, ⁊ gōitasom fesin calad ⁊ ba forrderg a muinter. Is de atā Rūadrucca Mind. Dolēicsed dūnad iarsin do Miunn ⁊ nī gegainside didiu nech dībsom acht insin namā. [43a] Asbreth fris. Nībbōi cin nombeith dōib nī, adalsad a mendot for Bōaind hi corRendaib. Is and bāiside ⁊ nī po sār dō telcudh dūnaid dō co taised don chath la Conc[h]obar.
Bāngleo Rochada annso.
Is iarum dosnāmic Rochad Rigderg mac Faithemain di Ultaib, tricha fer nimrin[n] dō, ⁊ gabais telaich ina farrad ⁊ arfōcarthar isin dūnad. Asbert Findabair iarum ba hē a cétserc. "Ma rodcarais didiu," or Ailill ⁊ Medb, "guid ossad dō co tī la Conc[h]obur don chath ⁊ fōi lais ambārach dadaig." Dognīth uile cen corbo rēith a breith fair. Focres a phupall dosuidiu a Findabair ⁊ fāid laisin ningin. Adfīadar sōn dona secht rīgaib di Muma. Asbert rī dībside: "Dobrethai damsa
