rēim hi Sleamon Midí. Bāithi do gail ⁊ gaisced ōm," ol Fergus; "bāithi di drūis ⁊ tairpthigi, bāithi di nert ⁊ mīadamlai, tatha didiu (?) di slūagaib ⁊ airbrib mo chomaltai fē[i]n Fergus mac Lēiti rī Līne, rind nāga tūaiscirt hErind.[1]"
"Tānic buiden mōr borrfadach aili and didiu isin telaig a Sleamain Midi," or Mac Roth, "ergal ān[2] riam,[3] errada iṅgantai foraib, lōech cōem ālainn ina hairinach, būaid crotha huile itir ḟolt ⁊ rosc ⁊ gili, itir mēit ⁊ costud ⁊ cōri, cūicroth ōir fair, brat hūaine hi forcibal imbii bratnas ōir isin brot hūasa dōit, lēne gel culpatach i custol imbi, tuiri rīgthaigi ina lāim, claideb ōrduirn iarna formna." "Is bruthmar a bara in chaurad chomramaich dadānig and ēm," or Fergus. "Amorgene mac Eiccitsach,[4] goband ō Būais antūaid[5] annsin."
"Tānic buiden aile and didiu isin telaig a Sleamuin Midi," ar Mac Roth. "Is bādud ar mēit, is tine ar āine, is leo ar aithigi, is cath ar līn, is all ar mēt, is oll ar nert, is brāth ara blāiriud, is torand ara tharpt[h]igi.[6] Lōech garbaineiuch hūathmar in airinach na buidne sin, ossē brūach bēlmar, folt garbh grendlīath fair, ossē srōnmar ballderg, brat riabain imbi, cūailli īaraind fora brut, cromscīath co fǣbur conndūala fair, garblēne trebraid i custol imbi, liathgǣi mār ina lāim, trīcha[7] semand aire, claideb .vii. ṁbrotha iarna formnai. Atracht in slōg uile ara chind ⁊ rolā[8] dīrmæ din chath imbi oc teacht isin telaig." "Iss cend erbāga dadānic," or Fergus, "is leth catha, is greit ar gail, is tond ainbt[h]ine[9] bādas, is muir dar crīcha .i. Celtchair mac Cuitheochair ō Dūn Lethglaisi atūaid."
"Tānic buiden aile ann didiu isin telaig a Sleamain Midi," or Mac Roth. "Lōech ēngel ina hairinach find huile itir folt ⁊ abrotchor ⁊ ulchai ⁊ decelt, scīath co mbūailich [48 b] ōir fair ⁊ claideb co nimdorn diad ⁊ manāis breifnech[10] ina lāim. Adlǣchda donārlaid a tōchim." "Inmain ēm in bethir bailc bēimnech dodānic," or Fergus, "in mathgamain mōrglonnach fri hecraidi
- ↑ sic, leg. hĒrend
- ↑ Later on erasure
- ↑ All except r later on erasure
- ↑ a stroke appears to have been added later to the h, thus hˉ: see Táin ed. Windisch, p. 767, note 6, leg. Eccetsalaig
- ↑ Originally atuaid, the stroke for n has been added later
- ↑ The second t has been added later beneath
- ↑ The letter which followed h has been erased, and a stroke added later to the h, thus h˘
- ↑ The la has been added later
- ↑ The t has been added later beneath
- ↑ The n has been added later beneath
