brat ⁊ tríana lénid, ⁊ sádid corthe [71b] tría medōn in drūith. Atāt a ndī chorthi and .i. corthi Findabrach ⁊ corthi in drūith. Fācbais Cūc[h]ulaind fón cruthsi[n] íat. Tīagair ō Ailill ⁊ ō Medb do íarmóracht a mmuntiri, ar ba fota leó rombátár. Co naccassa iarom isin tunidisin. Atchlos iarom fon dūnchaire uli anísin. Nī bái trā carti dóib la Coinculaind iartain.
[1]A mbátár int slóig and trāthnóna, co naccatar docurethar in lia forru anair ⁊ a chéli aníar ara cend. Condrecat isind aer; nothuititís eter dūnad Fergusa ⁊ dúnad nAilella ⁊ dūnad Nerand. Roboth ocond reibsin ⁊ ocond ábairt ōn tráth coraile, ⁊ robátár int slúaig inna seseom, ⁊ a scéith fora cennaib día sǽrad for barnib na cloch, combo lān an mag dina lecaib. Is dé atā Mag Clochair. Ecmaic immorro iss ē Cúrúi mac Dáiri dorigni insin. Dodeochaid do chobair a muntiri, ⁊ bói hi Cotail for cind Munrema[i]r maic Gerrcind. Doluidsidé ō Emain Macha do chobair Conculaind, co mbói in Ard Róich. Rofitir Cúrói ní bói fer fulaing Munremair insint slóg. It é didiu dorigensat ind abairt sin etorro andīs. Guitter ónt slóg forro bith na tost. Dognīat cōrai iarom Munremur ⁊ Cūrūi, ⁊ téit Cúrúi diá thig ⁊ Munremur do Emain Macha. Ocus ní thānic Munremur co lá in chatha. Ní thánic dano Cúrúi co comrac Firdíad. "Apraid fri Coinculaind," ol Medb ⁊ Ailill, "condarabni[2] clǣmchlód magni leis." Doberar dóib iarom ⁊ clǣmchlóid inad. Roscáich nónnin Ulad fosodain. Ar intan dofiuchtraitís asa cess, tictis drēcht díb beus forsin slóg conosgabad a tindorcain doridisi.
[3]Roimrāidset iarom macrad Ulad i nEmain Macha oco. "Tróg dún," arsiat, "ar popa Cūc[h]ulaind cen chobair dó." "Ceist ēm" o Fīachna Fulech mac Fir Febi, derbráthairside do Fīachaig Fíaldana mac Fir Febi, "rombíasa cethern lib, co ndeochsaindsea do thabairt cobra dó desin. [72a] Tíagait trī cōecait mac leis cona lorcaib áni, ⁊ be sé sin trian macraidi Ulad. Atací in slóg cucu tarsa mag. "Tofil slóg mór tarsa mag cucund," or Ailill. Téit Fergus día ndēscin. "Araill do macraid Ulad inso," forse, "⁊ do c[h]obair Conculaind tecait." "Ēirged buden ara cend," or Ailill, "cen fis do Choinc[h]ulaind, ar di[4] comairset fris, ní fǣlsaid íat." Tíagait trī cóecait lǣch ara cend. Immacomthuit dóib, conná tudchith[5] nech dīb i
