ná bása for mo nirt deside. Ūair día mbeindse for mo nirt, nī tóethsitís in macrad feb doroc[h]ratár, ⁊ ní tóethsad Follomain mac Conc[h]obair." "Cossain archena, a Chúcán; nī haisc dot inchaib ⁊ nī táir dot gasciud." "Airisiu sein innocht dún, a ócláig," or Cuchulaind, "arco ndīglom malle in macraid forsna slūagaib." "Nād anéb ōm ale," for int ōclǣch, "ūair cid mór do chomramaib gaili ⁊ gascid dogné nech hit arradso, nī fair bías a nós nách a allud nāch a irdarcus, acht is fortso. Is aire sin nād aniubsa, acht imberseo féin do gním gascid t'ōenur forsna slūagu, úair nī leó atá commus t'anma don chursa."
[1]"In carpat serda, a mmo phopa Láig," ar Cūchulaind. "In cōemnacar a innell ⁊ inn atá a threlom? Má cotnici a innell ⁊ má dotá a threlom, noninnill, ⁊ mani fil a t[h]relom, nāchaninnill etir."
Is andso atracht int ara ⁊ rogab a fíanerred aradnachta immi. Bá dond fíanerred aradnachta [79a] sin rogabastársom immi: a inar bláith bíannaide isé étrom āerda isé súata srebnaide isé úagthe osslethar, connā gebethar ar lúamairecht lám dó anechtair. Rogabastarsom forbrat faind taris anechtair, dorigni Simón drúi do Dair do ríg Rómān, co ndadarat Dair do Chonchobor, co ndadarat Conchobar do Coinc[h]ulaind, co ndarairbert Cūchulaind día araid. Rogabastar int ara cétnasin dano a chathbar círach clárach cethrochair co nilur cach datha ⁊ cach delba dara midgūallib sechtair; bá somassi dosom sin ⁊ nīrbo thórt[h]romad. Taraill a lám leiss in gipni ndergbudi, mar bad land dergóir do brondór brúthi dar or ninneóin fri étan dó ind chomartha a aradnachta sech a thigerna. Rogabastár idata aurslaicthi a ech ⁊ a del intlassi ina desra. Rogabastár éisi astuda a ech ina thūasri .i. aradna a ech ina láim in[2] chlī re imc[h]ommus a aradnachta. Is andso focheird a lúrecha īarnaidi intlassi immó echaib, congebethar dōib ō thul co aurdornd do gáīnib ⁊ bírínib ⁊ slegīnib ⁊ birc[h]rúadib, corbo birfocus cach fonnod isin charpatsin, corbo chonair letartha cach nulind ⁊ cach nind ⁊ cach naird ⁊ cach naircind don charputsin. Is andsin focheird bricht comga dara echraid ⁊ dara chomalta, connárbo léir do neoch isin dúnud ⁊ corbo léir dóibseom cách issin dúnud. Bá deithbir ém cé focherdedsom innísin, dáig ár bīth bátár teóra búada aradnachta forinn araid in lásin .i. léim dar boilg ⁊ foscul ndíri[u]ch ⁊ imorchor ndelind.
