sǣbglés dīberge dá churp i mmedón a chrocind. Táncatár a traigthe ⁊ a lúirgne ⁊ a glūne co mbātár da éis. Táncatar a sála ⁊ a orcni ⁊ a escata co mbátár ríam remi. Tāncatar tulfēthi a orcan co mbátár for tul a lurgan, combá métithir muldord míled cech mecon dérmár díbide. Srengtha tollfēthe a mullaich co mbátár for cōich a muineóil, combá métithir cend maic mís cach mulchnoc dímór dírim dīrecra dímesraigthe díbide. Andsin dorigni cúach cera da gnúis ⁊ da agid fair. Imsloc indara súil dó ina chend, issed mod dánastairsed fíadchorr tagraim do lár a grúade a hīa[r]thor a c[h]locaind. Sesceing a sētig co mbói fora grúad sectair. Ríastartha a bél co úrtrachta. Srengais in nól don ḟidba chnáma comtar écnaig a ginchroes. Táncatár a scoim ⁊ a tromma co mbátár ar etelaig ina bél ⁊ ina brágit. Benais béim nulgaib leóman don charput ūachtarach fora forcli comba métithir moltchracand cech slamsrúam thened doniged [80a] ina bél asa brágit. Roclos bloscbéimnech a chride re chlíab imar glimnaig nárchon hi fotha nō mar leōmain ic techta fó mathgamnaib. Atchessa na kꝉne Bodba ⁊ na cithnēlla neme ⁊ na hāible tened trichemrúaid i nnēllaib ⁊ i naéraib ūasa chind re fiuchud na ferge fírgarge hitrácht úasto. Rachasnig a folt imma c[h]end imar c[h]ráibred ṅdergscíach i mbernaid at[h]álta. Ce roc[h]ratéa rígaball fó rīgthorad immi, issed mod darísad ubull díb dochom talman taris, acht rosesed ubull for cach óenfinna and re frithchassad na ferge atracht da fult úaso. Atracht in lúan láith asa étun comba sithethir remithir airnem nócláich, corbo chomfota frisin sróin, co rodechrastár oc imbert na scíath oc brogad ind arad oc taibleth na slóg. Ardithir immorro remithir talcithir tresithir sithidir séolcrand prímlui[n]gi móri in buinne díriuch dondḟala atracht a fírchlethe a chendmullaig hi certairdi, co nderna dubchíaich ndruidechta de amal chíaig do rīgbrudin intan tic rí día t[h]incur hi fescur lathe gemreta.
Iarsin ríastradsin ríastarda im Choinculaind, is andsin doreblaing ind err gascid ina chathc[h]arpat serda co nerraib[1] īarnaidib, cona fǣbraib tanaid[ib], cona baccánaib, ⁊ cona birc[h]rúadib, cona. thairbirib níath, cona nglés[2] aursolcdi, cona thair[n]gib gáithe bitís ar fertsib ⁊ íallaib ⁊ fithisib ⁊ folomnaib don charpatsin. Is amlaid bói in carpatsin cona chreit chróestana chróestirim chlesaird c[h]langdírig caurata, ara taillfitís
