airsin anūas fogēba." "Nadeiris," or cāch, "is mōra na comadasin ⁊ na haiscedasin." "Is fīr ōn," or Fer Diad, "isad mōra; ⁊ cidad mōra chena, a Medb, is acotso fodeisin fāicfidther ma dula[1] damsa i naigid mo chomalta do chomrac.[2]" "A firu tra," orsī, or Medb, tri chōir nindlaig ⁊ imc[h]osāidi, "is fīr in brīathar asbert Cūchulaind," mar nā cloised Fer Diad itir. "Cē guth ēiside, a Medb?" or Fer Diad. "Adrubairt amanom,[3]" or sīsi, "nīpad furāil leis do thuitimsiu ina airigid gaiscid leis isin choiced i rragad." "Nīr bo c[h]ōir dosom a rād ōn, dāig nī hē mo trīamnass nā mo midlochos riam a llō nāch inn aichdi rofidir orm. Toingimsa ⁊ reliqua, corob[4] misi cētfer roficfa isin maitin imbārach co hāth in chomlaind." "Dotrīa būaid ⁊ bendachtain," or Medb; "is ferr[5] leam sin nā trīamnas ⁊ midlochos do fagbāil occot, dāig condolb cāch mo dāinib[6] fodesin. Cid cōro dosom sochur Ulad do dēnam arapa a māthar dīb indās daitsiu sochar chōicid Connacht, dāig at mac rīg Connacht adcǣmnacair?"
Is amlaid robādarsom oc naidm a cor ⁊ a n-dāla ⁊ dorigniset lāid and.
"Rotfīa lōg mōr mbuindi,
co cuit maigi is cailli,
co sāire do chloindi
ōndiu[7] co tī brāth.
A Fir Diad mic Damā[i]n
atted[8] ūas cach anāil,
is cōir dait a gabāil
anī gabus cāch."
"Nocho gēb cen ārach,
dāig nīm læch cen lāmach;
bid trom formsa amārach,
bid hūas dam a ḟeidm.
Cū dīan comainm Culand,
nī hulaṅg[9] nī hurisa a ḟulaṅg,
is amnas an urrand,[10]
is tairptheach in teidm."
- ↑ leg. mad dula?
- ↑ On the margin is something like obar
- ↑ This is what the ms. seems to have; the fourth letter might be r
- ↑ b has been inserted later
- ↑ Before err ms. seems to have either s or f, and before that probably i
- ↑ The two last letters are doubtful
- ↑ d added later below
- ↑ The second and third letters are doubtful; the original letters (? tc or c) seem to have been erased
- ↑ ni hulang is metrically superfluous, and should be omitted
- ↑ inn urrand LL.
