— 10 —
GÅRNIR
I fåt bén k’ dji fwaixhe çou k’ ti n’ oize fé !
POREA
Dj’ inme mî l’ trankilité, mi Pierre, et pus vite ki di m’ disputer…
GÅRNIR
Vos inmez mî di vs taire et do dner tofer råjhon a vosse feme. Ci n’ sereut nén mi paret !
POREA
Pa vos djhîz torade ki vos leyîz barboter Tonton sins l’ responde.
GÅRNIR
Paski dji sés bén k’ elle assotixhe co pus cwand dji n’ l’ aconte nén ! Mins i n’ fåreut nén k’ elle rotaxhe so mes pîs savez, paski (tchantant) je lui toiche la tiesse, tout comme à un colon, tout comme à un colon ! (pårlant) Oho, a propôs d’ colons, Lambert, dji m’ va ouy mete mi djonne…
POREA
Ké djonne ?
GÅRNIR
Pa m’ djonne bleu, ki dj’ a saetchî foû del frumele ki Djôzef m’ a dné ! Ene boune sôre valet, on colon k’ a fwait totes les tapes l’ anêye passêye et k’ a tofer rivnou dvins les pris, — l’ ass rovyî ?
POREA (si sovnant)
Neni, neni, on bleu, dji m’ è sovén !
