— 21 —
POREA
… Et tot avå l’ Vinåve wice ki çoula n’ manke nén d’ esse repeté, on dit k’ vos estoz-st ene grandiveuse, ki vos n’ savez kî k’ vos estez, ki vs pinsez surmint ki personne ni vs våxhe…
DADITE (måle)
C’ est bon, c’ est bon, dji n’ a d’ keure di çou k’ les djins pinsexhe.
POREA
(d’ ene air di rprotche et vnant dlé Dadite)
Vos n’ avez d’ keure di personne dê vos ! Mins cwand on n’ est nén ritche et k’ on vike di tot l’ monde, come nozôtes, edon båshele, bén i n’ fåt nén esse insi paret ! Vos savez bén, k’ a cåze di vos grandeurs, nos avans co pierdou l’ pratike di mon Lakaye ! Des djins ki nos fjhît tant ovrer, et asteure dji n’ fwai pus tant seulmint ’ne crete por zels. Et çoula cåze di vos tweletes a falbalas. Vos estîz pus gåye ki Madame Lakaye cwand c’ est k’ vos y alîz po toutchî vos çanses et, surmint k’ on s’ årè dit, ki, si vos polîz vs moussî insi, nos n’ divîs nén aveur beacôp mezåjhe d’ ovraedje et il ont fwait leus bons po ene ôte graveu. Vola çou k’ vos avez wangnî. Et portant vos savez bén, k’ i n’ a måy trop di çanses cial edon. Torade l’ ivier va vni. I vs fårè co ’ne rôbe, on mantea, on tchapea… ou motoit ’ne pelisse tot come madame Fordjeu li rintire. Mins nos n’ estans nén des rintîs paret nozôtes, Dadite. Nos n’ estans k’ des ovrîs et vos l’ rovyîz on pô trop sovint, la !
