— 24 —
DADITE
On-z est todi ossu contin d’ vos insi, amon Baneur ?
EMILE
Todi parey. On djåze minme di m’ diner ene ogmintåcion
DADITE (continne)
Asteure !
EMILE
Awè.
DADITE
N’ est ç’ nén e moes d’ djulete di ciste anêye ki vs avez co avou ene ?
EMILE
Siya.
DADITE
Et vos årîz co ene asteure ! Bon la m’ fi ! Al bouneure. (tote fire) Do moens vos, vos n’ serez nén on ptit ovrî, come vosse pere ! On dessineu, c’ est èn ome comifåt ! Vos wangnîz dedja cint francs par moes ; vos parvinrez a nd aveur cint et cincwante. Et pu tos les ovraedjes ki vos polez co fé après djournêye… Alans djans, merci l’ bon Diu, mes sohaits sont advinous et cwand dji mourrè, dji serè do moens rassurêye so vosse sôrt. I gn a co portant ane sacwè ki m’ tchagrene.
EMILE
(tot s’ ashiant dilé l’ sitouve)
Di cwè don mame ?
