- 93
Ti sekretario kinitana a kasla adda bassit danag na da Padre Sibyla ken Padre Irene. Rumuar ti kadadaklanen. Dagidi dua nagsaganada.
—Ti dawat dagiti agad-adal tapno maipalubos ti pananglukat da iti maysa nga Akademya ti sao ti kastila,—insungbat ti sekretario.
Nadlaw nga amin dagiti adda iti salas naggarawda ket kalpasan ti panagkikinnita da, inturungda dagiti matmata da iti Jeneral, tapno mabasada ti ikeddeng na. Innem a bulanen a ti dawat dagiti agad-adal nga agur-uray iti keddeng ket nagbalin a kas maysa a casus belli (puon ti gubat) kadagiti dadduma. Ni Ekselensia sibababa dagiti matmata na, a kasna itay pangilisi, tapno dida mabasa dagiti panpanunot na.
Ti ulimek nagbalin a nadagsen ket naawatan ti Jeneral a kasta.
—¿Ania ti pamanunutan yo?—sinaludsudda iti daydi nangato nga agturay.
¡Ania kad ti kunak, Jeneral!—insungbat ti nasaludsudan, a intal-una ti abaga na, ket immisem iti napait;—!ania kad ti pamanunutak no saan a day toy: ti dawat, nalinteg, nalinteg unay, ket kas pay dumlawak ta innem a bulan a inna pinanpanunot!
—Adda ngamin nainaig ket a banag a rebbeng a panunuten,—kinuna ni Padre Sibyla, a silalamiis ket kasna pay inkidem dagiti matmata na.
Ti nangato nga agturay intal-una manen ti abaga na a kas itay dina naawatan no ania daydi a banag.
—Saan la a gapo ta dina pay kanito,—intuloy daydi dominiko,—saan la a gapo ta dayta a dawat inna dadaelen dagiti naiteden a sagsaguday mi. . .
Ni Padre Sibyla dina naitured a tinuloy ket kinitana ni Simoun.
—Ti dawat, nakaaa-tap bassit,—intuloy ni Simoun, a nakikinnita iti dominiko.
Toy nagkiray iti namindua. Ni Padre Irene, a nakakita kadakuada, naawatanna nga istay naabaken ti dawat: ni Simoun supiatenna gayam.
—Maysa dayta a natalna a yaalsa, maysa a gulo iti papel seliado.,—innayon ni Padre Sibyla.
—¿Gulo, yaalsa?—sinaludsod daydi nangato nga agturay, a kinitana dagiti sitatallaong, a kas itay awan inna maawatan.
—Idaulo dagiti sumagmamano nga agtutubo a matudtudo a nawada unay ti panagpanpanunot da ket napalalo ti ayatda nga agbaliw dagiti agdama a kaskasasaad, no awan sabalin
