- 217
nangbaybay-a a maminpinsan iti masakit ken ti inna panangitulnog iti nangngaasi kenkuana iti tanem, iti maysa a
dalan a napno kadagiti sabsabong ken ladladawan a naragsak. ta kunana a nasaysayaat ngata ngem ti inna panangpaatiddag iti biag na a paglasatenna iti dalan dagiti ado a
rigrigat.
—Ti ket kinaang-ang ko!—namin-ado a kunkunana iti bagi na met laeng—dagiti kaaduan, ang-ang da, ket bayadanda, ngarod . . .
Ngem iwingiwingna ti ulo na, ta malagipna ni Juli, malagipna ti nalawa a kasakbayan a masangwananna: ararapaapenna ti agbiag a saan a mamulitan ti puso na. Surutenna ti naikari a panangagas ket inna banbantayan.
Nupay kasta, ti masakit madlaw a dumagsen ti sakit na iti tunggal aldaw, uray pasaray sumardeng bassit ti gurigorna. Ni Basilio, ta inrantana nga in-inuten a ikabkabassit ti apian a itedna, wenno uray la no dina patpatubuyan a mapalausanna ti kadawyan a susupen na, no kasta a sumangpeten nga aggapo iti Ospital wenno agsarungkar kadagiti agagasan na, madatnganna metten a matmaturog iti nabantot a turog a ited ti apian, agkatkatay ken sibebessag a kasla maysa a bangkay. Daydi bumaro dina maawatan no adino ti mabalin a paggaptian ti apian; dagiti kakaisuna a mapmapan iti balay isuda laeng da Simoun ken Padre Irene, ti immuna, manmano met no mapan, ket ti naudi dina met sardayan a igunamgunam kenkuana nga agiget ket saan a paay-ayo no maipapan iti pannakaagas ti masakit, ket saan na nga italtalek ti panagpungpungtot na, ta ti nasken, iso ti panangispal kenkuana.
—Tungpalenyo ti annong yo, bumaro,—kunkunana ken kuana,— tungpalenyo ti annong yo.
Ket inna bagbagaan iti maipapan iti daydi a banag, a kasta unay a rasok ti ayat na, ta ni Basilio mangrugrugi a kaay-ayunan daydi mangaskasaba. Ni Padre Irene ikarkarina pay a ikalikagom iti maysa a nasayaat a pagsaadan, may sa a pangukuman a nasayaat ket inna pay iparparatapat ti pannakabalin na a maikabil a mangisuro iti Unibersidad. Ni Basilio, a saan ket unay a manginanama, kasna ipakita a mainati ket tungpalenna ti ibaga ti nakem na.
Iti daydi a rabii, idi madamada nga ipabpabuya Ti Les Cloches de Corneville, ni Basilio adda nga agad-adal iti sango ti maysa a daan a lamisaan, ti silaw na, pagsaingan a nagsegden iti lana, a ti nakudrep a sarapa na a sarming lingdanna bassit ti naliday a rupa na. Adda makita a naiparabaw
