234
—!Agawidtayon, balasang ko, into ket no agpanatengkal —inpukkaw iti daydi a kanito ni dunia Victorina.
Daydi timek iso ti nangaon kadakuada iti yuyeng dagiti dardarepdep da. Kanito idin ti panagawid da, ket inawisda a siaayat ni Isagani a makikalugan kadakuada, awis a saan a pinaulit ti bumaro. Gapo ta ni Paulita iso ti akinkukua iti lugan, kadawyan a ti nagtugaw iti kadaklan isuda dunia Victorina ken daydi pagayam na, ket iti bassit a tugaw iti sango iso ti nagtugawan dagidi dua nga agayan-ayat.
Ti pannakikalugan na kenkuana, ti panagbaybay da, ti pannakasaysay-op na iti banglo na, ti pannakaisagidsagid kenkuana ti seda nga aruaten ti ay-ayaten na, ti pannakakitkita na kenkuana a sipapanunot, sidadalikepkep, a dinigos ti lawag ti bulan ti Pilipinas, a mamagbalin kadagiti kagugubsangan a banbanag a kasla nagpunipunan libnos, tagainep daydi a saan a ninamnama ni Isagani! jAsi da payen dagiti agawid a magmagna nga is-isuda, ket mapilitda nga aglisi tapno palabasenda daydi napardas a lugan! Iti amin ti dalan iti igid ti baybay, iti lansangan a Sabana, iti rangtay ti Espania, awan sabali a nakita ni Isagani no saan a maysa a rupa a nalamuyot, nakasaysayaat ti pannakasagaysay ti buok na, ket agtungpal iti maysa a nalap-it a tengnged a liningdan ti narasay a ukkor a pinia. Maysa a brilyante ti mangidkidday kenkuana manipod iti piditpidit ti bassit a lapayag, a kasla maysa a bituen iti nagbabaetan dagiti kas pirak a ul-ulep. Ni Isagani adda nangngegna nga adayo a timek a nagsaludsod ken don Tiburcio de Espadania, ti nagan ni Juanito Pelaez, ngem kasla aweng ti maysa a kampana a mangngeg iti adayo, kasla timek a maallingag no madama datao a matmaturog.
Masapol a inbagada kenkuana a nakadanundan iti plasa ti Santa Cruz.
