Nasapa unay ni Basilio a bimmangon a napan iti Ospital. Naiwayatnan ti panggep na nga aramiden; inna sarungkaran dagiti masaksakit na, santo mapan iti Unibersidad a mapan umamad iti maipapan iti panaglisensiado na, iti kalpasan na, mapan ken Makaraig a gapo iti busbusen na iti inna panaglisensiado. Istay iso amin ti naur-urnong na a sangkabassit inpaayna a pinanubbut ken Juli ken pinagpatakderna iti maysa nga abong a pagyananda iti apona a lakay, ket saan na met a maitured ti dumawat ken Kapitan Tiago, ta mabuteng ania la ket ta makunana a kayatna a maipaunan ti tawid na a kanayon a inna ikarkari.
Gapo iti panangpanpanunot na kadagitoy, saan na a nakita dagiti pinurukpurok nga agad-adal a numan pay bigbigat unay, agsublida a kasla itay nagrikep dagiti pagadadalan; adadda man la ngaruden a saan na a nadlaw ti madandanagan a garaw dagiti dadduma, dagiti panaggiinnarasaas da, dagiti nalimed a panagpipinnatuldo da. Iso ti gapona nga idi ta nakagteng iti Ospital ti San Juan de Dios, ket inna sinaludsod dagiti gagayyem na ti maipapan iti masasao a panagem a pananggubat iti Turay, ni Basilio limmagto, ta nalagipna ti gulo nga inbaga ni Simoun a saan a nagtuloy a nagbettak gapo iti di maawatan a napasamak daydi joyero. Sibubuteng, ket timek na ti namalbaliw, nagsaludsod a inkagumaanna ti nagindidiammo:
!A! ti gulo?
—Nasalamaan!—insungbat ti maysa,—ket kasla adudan sa dagiti mairamraman.
Ni Basilio inkagumaanna ti nanerred iti bagi na.
—Aduda dagiti mairamraman?—inulitna a kinayatna a binasa ti adda iti mata dagiti dadduma.—Ket asinno da. . .?
—Agad-adal, ado nga agad-adal!
Ni Basilio pinagarupna a saan a naannad ti agsaludsuden, iti buteng na a mailako, ket immadayo iti yan da, a pinagpambarna ti inna panangkita kadagiti masaksakit na.
