- 269
—!Agannadkayo, agannadkayo! — ipatpatigmaan daydi maestro, a timek na ti makasangsangit.
—Dakay la ti makaammon iti asawak ken kadagiti annakko nga ul-ulila!—yar-araraw daydi nalaka a mamati, a ti timekna adadda man a makasangsangiten.
—Daydi daksanggasat ipatunan a sinarutsarot dagiti balbala ket nalpasen a naitabon.
Iti daydi a rabii, dagiti guardia kadagiti ruruangan ti dakkel a pagilian inda nasukatan iti artiliero a kakastila, ket iti sumuno a bigat, idi sumingising dagiti umuna a sinsinamar ti init, ni Ben-Zayb a nagtured a immulog a nasapa ta inna kinita ti kasasaad dagiti murmuralia, nasarakanna iti asideg ti tay-ak ti Luneta, ti bangkay ti maysa a balasang a india, nganngani silalamulamo ket naiwalang. Ni Ben-Zayb nakigtot, ket kalpasan ti panangsagid na iti bangkay iti bastonna, ken panangkita na iti yan dagiti ruruangan, intuluyna ti nagna, a panpanunutenna ti inangurnos iti maysa a sarita a nasennaay maipanggep iti daydi. Nupay kasta, awan naipablaak a nakasagid iti daydi kadagiti pagpagiwarnak ka dagiti sumuno nga al-aldaw, ket ti inda sinarsarita iso dagiti pannakatkatuang ken pannakaigalgalis, gapo kadagiti ukukis ti saba, ket, gapo ta awan damag, ni Pay Ben-Zayb napilit a nangikatiddag iti inpablaak na maipanggep iti maysa a bagyo a nangdadael kadagiti pagpagilian ken namapatay iti nasurok a dua ribo a tattao, sadi Amerika. Kadagiti ado a sinalsalawasaw na, masarakan toy:
“Ti asi nga ADADDA A MARIKNA KADAGITI PAGPAGILIAN A KATOLIKO NGEM KADAGITI SABSABALI, ken ti lagip daydi immay pinaipatli gapo kadagiti TATTAO, agsipod iti asi Na, iso (sic) ti manignay kadagiti puspuso mi a mangsennaay kadagiti pasamaken a rigrigat dagiti pada a tattao ken agdawat tapno ITI DAYTOY A PAGILIAN, a kasta unay ti pannakagugor na kadagiti bagbagyo, saan kuma a maim-imatangan dagiti makasasakit a naar-aramid a nakita dagiti agindeg sadi Estados Unidos!”
Ni Horatius dina pinakawan daydi a kanito ket inna sinungbatan iti paset ti PIROTECNIA na, a dina met nasasao, dagiti natnatay, daydi nakakaasi nga india a pinatayda, uray la kuman dagiti nakabkabil. Kinunana:
