- L’Espagne et sa vertu, 1’Espagne
- et sa grandeur, Tout s’en va!
- —Victor Hugo
Dagiti pagpagiwarnak sadi Manila napalalo a pannakaparinggor da maipuon iti maysa a nagkadinamag a pinatayda a tao sadi Europa; maringguranda met a mangipadpadayaw kadagiti papadi a nalaing a mangasaba sadi Manila ken kadagiti kanayon a umad-ado a balballigi ti opereta pransesa, ket apaman la no masanguda sagpaminsan a ipadamag dagiti ar-aramiden kadagiti pagpagilian ti sangapangen a tulisan a ipanguluan ti maysa a nakabutbuteng ken narungsot, nga agnagan iti MATANGLAWIN. Isuna laeng no daytay maysa a konbento wenno maysa a kastila ti maarang, iso tay adda ikabilda nga atiddag nga artikulo a pangipadamagan da kadagiti nakakigkigtot a naar-aramid ket dawatenda a maikeddengen nga adda gubat, dawatenda a maipakat dagiti naiget a pampamuspusan, kdmpy. Iso ti gapo na a saan da a nasango nga inpadamag ti naaramid sadi Tiani, awan uray apagapaman a nasasao wenno natanabutob. Kadagiti babassit a paggigimungan, adda bassit a matantanawtaw, ngem saan a nalawag, kasla saan a pudno, kas la di patpatien, ta saan pay a naammuan no ania ti nagan daydi daksanggasat a natay, ket dagiti adadda a nangipakita iti ayat da a makaamad, iti nabiit, inda nalipatan, ta inpapanda no dagiti nagannak wenno kakabagyan ti nadangran nayatda a nakisinnurot. Ti laeng kakaisuna a naammuan a pudpudno a na aramid, iso ti pannakayalis ni Padre Camorra iti sabali nga ili wenno ti panagyan na iti bassit nga aldaw iti konbento da sadi Manila.
—!Asi pay ni Padre Camorra!—kinuna ni Ben-Zayb, a kasna pinangipakita iti ayat na;—nagragsak, nagsayaat ti panagpuspuso na!
Pudno a dagidi agad-adal napasublida ti wayawaya da yaman pay kadagiti panangidawdawat dagiti kakabagyan da, isuda nga awan pinakawanda a binusbos, in-inted, regregalo
