- Ket ti apoy dina tay kuma makita
- nga agdadangadang uray kaano!
- Ngem iti panagkaykaysa nga ituyang
- Ti sirib a mannakabalin unay,
- Kadagiti kalkaldera a sumsumged iti tian,
- Nga awan ket pungtot ken gura, uray ania man,
- Intay patauden ti maikalima a pigsa, nga iso
- ti alisugasog, wenno singaw,
- Rang-ay, biag, lawag ken garaw!
- Ket ti apoy dina tay kuma makita
-¡Tagtagainep, tagtagainep!-insungbat a simamaga ni Simuon; ti makina nganngani maidungpar... ket innak pay ngad inumen ti serbesak.
Ket pinanawanna, a di pay nagpakadan, dagidi dua nga aggayyem.
-Ngem, ¿ania ti simru kenka ita, ta naayatka a makisupiat? sinaludsod ni Basilio.
-Awan, diak ammo, ngem dayta a tao, karurudko, ngan-nganik kabuteng.
-Siksikilenka itay; ¿dika ammo a daydiay a tao nagnaganenda iti Kardinal a Pugot?
-Kardinal, a pugot?
-Wenno Eminensia a Nangisit, no iso ti kayatmo.
-Dika maawatan.
-Ni Richelieu adda namalbalakad kenkuana idi a maysa a kaputsino a ninagnaganda iti Eminensia a Garit; ket ni daytoy iso ti mamalbalakad iti Jeneral...
—¿Agpayso?
—Kasta ti nangngegko iti maysa... a no adda iti likudan na, kanayon a dakes dagiti sasao na kenkuana, ngem no adda iti sango na, inna daydayawen.
—¿Sarsarungkaranna met ni Kapitan Tiago?
-Nanipod pay idi immuna nga aldaw a idadateng na, ket pudno a tay maysa pagarupenna a kasalisal na... nga agtawid... Ket atapek a inna met kitaen ti Jeneral maipang- gep iti pannakaisuro ti sao ti kastila.
Iti daydi a kanito, maysa a babaunen ti immasideg a nangibaga ken Isagani a paayaban ni uliteg na.
Iti maysa kadagiti bangbangko nga adda iti popa, a nailaok kadagiti dadduma a nagsakay, adda a nakatugaw ti maysa a padi a pilipino, a kumitkita kadagiti agsasaganad a mabuybuya a malabasan. Dagiti adda iti asideg na inadaywanda bassit; dagiti lallaki, no lumabasda iti yan na, ikkatenda dagiti kalkallugong da; ket dagiti mannugal dida maitured a yaplag ti paggaayaman da iti asideg na. Daydi a padi
