310
Nupay kasta, ti panganan dagiti dadakkel a didios awan sadiay, adda iti tengnga ti nalawa a bansag, iti nakatartaraki a kiosko, a nairanta a pinaaramidda iti daydi a rambak. Maysa nga inakilis a kayo a nadorado, iso a pagkalatkatan dagiti nabanglo a mulmula, ti manglinged iti uneg toy a disso kadagiti matmata dagiti kaaduan, ngem dina ket lappedan ti angin, tapno mataginayon ti lamiis a masapol kadagidi a bulbulan. Maysa a nangato a batay iso ti nangipangato iti lamisaan a saan ket a naipatas iti panganan dagiti tattao latta, ket maysa a langit-langit a pinintaan dagiti kalalaingan nga artista iso ti mangigaga kadagiti naindaklan a bangngabangnga iti naapal a ikikita dagiti bitbituen.
Sadiay, awan adda no di laeng pitpito a kubiertos; dagiti ar-aramaten, kas pingpinggan,basbaso, kspy., bin-ig da a pirak, ti arpaw ti lamisaan ken dagiti pagpunas, nalapatda unay a lino; dagiti ar-arak, dagiti kapapatgan ken kaiimasan. Ni don Timoteo sinapulna ti adadda a di marmarna ken kanginginaan, ket saan kuma a nagkitakit a pimmatay, no nasauda laeng a ti Kapitan Jeneral imasenna unay a sida ti lasag ti tao.
