Jose (iso ti yan dagiti ububbing a babbai a nagsilaw, nadalungdungan dagiti ul-ulo da iti panio a nasiglot iti babaen dagiti timtimid da, lulualuenda met ti Rosario, nupay saan unay a naunget a kas pammayan dagiti lallaki. Iti tengnga, addada ububbing a nagguyod kadagiti parparol a sinankuwing a babassit, nasakabanda iti papel de Japon, nasilawanda iti bassit a kandela a nalabaga, nakatangar dagiti ip-ipos da a papel a nasamsambiryan. Dagiti ububbing ikuyugda dagidi nga abalbalayda a makilibot, a pangrambakda iti pannakayanak ti Mesias.
Ket dagidi babassit nga ay-ayop a nalulukmeg ken nagbukbukel a kasla iplog, kas met itay inda maragsakan, ta pagamuan la ta lumagtuda, maibasingda, matuangda ket mauramda; ti akinkukua tumaray a mangiddep iti kasta unay a darang, puyot a puyot, maatipana ti apoy iti bin-ig a batbat ket inton makitana a nadadaelen ti abalbalay na, pagangayanna ti agsangit. Daydi kotsero napaliiwna a sililiday a dagiti babassit nga ay-ayop a papel bumassitda iti intunggal tawen, a kasla ket itay agangulda met a kas kadagiti ay-ayop a sibibiag. Iso, ni Sinong, a napangpang-or; malagipna dagidi dua a kabkabayo na a kasta da unay naglaing, a gapo iti ayat na a mailisida iti sakit, pinabenditaanna ida, kas inbalakad ti kura, iso a binayadanna iti sangapulo a pisos:— ti Turay ken da giti kukura awan sabali a nasarakanda a kasayaatan a pamuspusan iti panagpatay dagiti tartaraken—ket nupay kasta, natayda met laeng. Ngem ket di, naliwliwaan, ta nanipod idi nawarisanda iti danom a bendita, nanipod idi linatinlatinan ida ti padi, ket naaramid dagiti an-annong, dagidi kabkabayo na immuyungda, ta dida kinayat ti pinaipakaten. Ket iso, kas naimbag a kristiano, dina met ida naitured a dinusan, gapo ta inbaga kenkuana ti maysa nga ermano tersero a nabenditaanda.
Ni Apo Santa Maria iso ti naudi, nakaaruat iti Dibina Pastora ket nakakallugong iti akaba ti bulong na nga atitiddag dagiti dutdutdot na, tapno maipakita ti ipapan na sadi Jerusalem. Ket tapno maawatan ti inna panagpasngay, ti kura inbilinna a padakkelenda bassit ti tian na ket ikkanda kadagiti rigrigis ken kapkapas iti uneg ti pandiling na, tapno awan agduadua iti kasasaad na nga agdadagsen. Ti ladawan, nalibnos unay, naliday met ti rupa na, a kas kadagiti amin a ladladawan nga aramid dagiti pilipino, kasla adda sangkabassit a bain a inariknana gapo ngata iti namayan kenkuana ti padre kura. Iti sango na, iso ti yan dagiti kanturis; iti likudan na, sumagmamano a musiko ken dagiti sibil a saan nga
