Idi ta mangrugi nga agrepike dagiti kamkampana gapo
iti niisa iti tengnga ti rabii, ket dagiti kaykayat da ti nasayaat
a turog ngem dagiti amin a ramrambak ken an-annong iti
Sinibaan, agriingda a makapungpungtot iti kasta unay a ringgor ken ragsak, ni Basilio immulog a nagin-inayad iti balay,
namindua wenno namitlo a nagpalpallikos kadagiti sumagmamano a lanlansangan, ket idi mapnekanna nga awan mangsursurot wenno mangsisiim kenkuana, kinamangna dagiti
dandana a saan unay a pagpagnaan nga agturong iti daan a
bakir dagiti Ibarra, a ginatang ni Kapitan Tiago, idi ta innala ti Turay dagidi a kukkukua ket inna ida inlako.
Gapo ta iti daydi a tawen nairana a ti paskua agtinnag iti daya, napalalo a nagsipnget. Nagsardengen ti repike ket isuna laengen a maallingag iti kaltaang ti rabii ti aweng ti kainpana nga agullayat a maipakuyog iti panespes dagiti sangsanga a pagkutien ti pul-oy ken ti naurnos ti panagsasaganad na a danarudor dagiti daldalluyon ti asideg a danaw, a kas man nabileg nga anges ti lubong a sinamayan ti nargaan a turog.
Piman ta nasdeman iti daydi a disso ken iti daydi a kanito. ti bumaro magmagna a sidudumog, a kas adda kayatna a kitaen iti let-ang ti sipnget. Pasaray inna itangad ti ulo na a mangsukimat kadagiti bitbituen iti nagbabaetan dagiti nagsasanggala a sangsanga dagiti kaykayo, sana ituloy ti magna nga inna iwalinwalin dagiti dadakkel a ruruot ken gepgeppasen dagiti lanlanot a mangabbeng iti dalan na. Pasaray na sublien ti pinagna na, ti sakana pasaray maisimbalod kadagiti lanlanot, pasaray maitigkol kadagiti ramramot nga agpaparang wenno kadagiti kaykayo a natnatuang. Kalpasan ti maysa a gudua ti uras, dimteng iti maysa a bassit a waig, waig a iti baliw na adda timmakder a kasla turod, nangisit ket awan mabigbig a langa na, ket gapo iti sipnget, kasla maysan a bantay ti kadakkel na. Ni Basilio binaliwna ti waig ket linagtulagtuna dagiti batbato nga agparangda a nangisit iti naraniag a danom, sinang-atna ti turod ket nagturong iti
