Dagitoy isuda dagiti panpanunuten ni Basilio idi inna
sinarungkaran ti tanem daydi ina na. Agawid kuma iti ilin,
idi ta kasla adda nasaripatpatanna a silaw iti nagbabaetan
dagiti kaykayo ket nakangngeg iti reppaak ti sanga a maspak,
arimpadek, panagririssiris dagiti bulbulong. . . Naiddep ti
silaw, ngem ti arimpadek adadda a nailasin a naimbag ket iti
nabiit, inna nakita ti maysa nga anniniwan a nagparang iti
tengnga daydi a disso, a magmagna nga agturong iti yan na.
Ni Basilio sigsigod a saan a mamatpati kadagiti datdatlag, ket nangruna la ngaruden kalpasan ti inna panangrangrangkay kadagiti ado a bangbangkay ken inna pannakakitkita kadagiti ado a nagbugbugsot; ngem dagidi daan a sarsarita maipanggep iti daydi napanes a disso, ti kanito, ti sipnget, ti naliday a sagawisiw ti angin ken dagidi sarsarita a nangnangngegna idi ubing pay, simkenda bassit iti nakein na ket nariknana a ti puso na nagpitik iti napigsa.
Ti anniniwan nagsardeng iti maysa a bangir daydi baliti ket daydi bumaro inna nakita iti nagbaetan dagiti dua a ramramot, a iti bayat dagiti tawtawen dimmadakkeldan a kasla dua a puon ti kayo. Innalana iti uneg ti aruat na ti maysa a pagsilawan a napigsa ti lawag na, nga indissuna iti daga ket iso ti nakasilawan dagiti bolbotas na a kas ti maaruat no agsakay datao iti kabayo; ti dadduma a bagi na nalingdan iti sip nget. Ti anniniwan kasna sinukimat dagiti bulbulsa na, idi kuan, nagkubbo, ta inpunta na ti maysa a pagkali iti murdong ti sarukod na a nabaked: ni Basilio kasna nailasin a sisisiddaaw ti langa ni joyero Simoun.. Iso nga agpayso.
Daydi joyero kalkalienna ti daga, ket pasaray masilawan ti rupa na, awan daydi antiukos na a balbag, isuda a mamagbalbaliw unay iti langa na. Ni Basilio nagkintayeg. Daydi a tao iso met la daydi di am-ammo nga idi maikasangapulo ket tallo a tawen, iso ti nangkali iti tanem daydi ina na, isuna la nga ita, limmakayen: dagiti bubuok na nagubandan ket adda payen iming na iti bibig ken iti timid na, ngem dagiti matmata na isuda met laeng, iso met la daydi rupa a napait, iso
