Iti sumuno nga aldaw, a kasta unay siddaaw dagiti taga
away ta napan nagdagos iti balay ni Kabesang Tales ni joyero
Simoun, a sinaruno dagiti dua nga ubbing na a nagawit kadagiti dadakkel a malmaleta a nasuputan iti nalagda a lupot.
Iti let-ang ti rigat a namatapat ken Kabesang Tales, dina nalipatan dagiti naimbag a kadkadawyan dagiti pilipino, ket di
na ammo ti kukuen na no panunutenna nga awan la ti adds
kenkuana a pangsangailina iti napan nagdagos. Ngem ni
Simoun inkuyogna amin; ubbing ken amin a masapsapol, ket
isuna la a kalikagumanna ti agdagos iti daydi a balay iti bayat
daydi nga aldaw ken rabii, gapo ta iso ti kasayaatan kadagiti
balbalay iti away ken gapo ta adda iti nagbaetan ti San Diego
ken Tiani, il-ili a pagurayanna kadagiti ado nga mapan aggatang.
Ni Simoun damdamagenna ti kasasaad dagiti daldalan ket salsaludsudenna ken Kabesang Tales no ti rebolber na umanay a sarikedked na kadagiti tutulisan.
—Addada palpaltog da nga adayo ti madanun da!—kinuna ni Kabesang Tales, a kasla sabali ti yan ti nakem na.
—Toy a rebolber saan met a bassit ti danunen na,—insungbat ni Simoun, ket inpaturungna iti maysa a bua nga adda ngata dua gasot nga addang ti kadayo na.
Ni Kabesang Tales nakitana nga adda nagtinnag a bungbunga daydi bua, ngem saan a naguni ket tinuluyna ti nagpanunot.
Nain-inot a nagdadateng dagiti nadumaduma nga agkakabbalay a naawis iti damag dagiti al-alajas daydi agtagtagilako; nagnininnaganda a nagkikinnablaaw iti naimbag a paskua, nasarsaritada dagiti mismisa, sasanto, dakes nga apapit, ngem nupay kasta, inda busbusen dagiti naiduldulin da a paggatang kadagiti batbato ken dadduma pay nga awan pagpapaayan da nga aggapo sadi Europa. Damag a daydi agtagtagilako, gayyem ni Kapitan Jeneral, ket saan a dakes ti makiam-ammo kenkuana, ania la ket ta adda maaramid.
