- 673
Daydi naimbag a baknang, numan pay aduda dagiti nabasbasa na maipanggep kadagidi nagkakauna, di pay nakakita iti uray ania a maipapan kadakuada, a ta awan met museo sadi Pilipinas.
—Addada pay inkuyugko a nangina unay nga ar-aritos dagidi babbai a romana a nasarakan iti disso daydi balay ni Annio Mucio Papilino sadi Pompeya. . .
Ni Kapitan Basilio intangedtangedna ti ulo na a pangipaawatna nga ammuna ainin dagidi ket ganatenna a makita dagidi ingget pateg a nabatbati dagidi nagkauna. Dagidi babbai kunada met a kayatda dagiti naggapo sadi Roma, kas kukuentas a binendisiunan ti Papa, relrelikia a mamakawan kadagiti basbasol a saan a masapsapol ti agkonpsesar, ken dadduma pay.
Idi naluktan daydi maleta ket naikkat ti kapas a maikabil a sarapa na, nagparang ti maysa a pagikkan a napunno kadagiti singsingsing, relrelikaryo, guarguardapelo, krus, aspili, kdmpy. Dagiti birbrilyante a nailalaok iti nataraki kadagiti batbato a nadumaduma a kita, arigda ti agipugpugso iti apoy ket kasda mamigerger iti nagbabaetan dagiti sabsabong a balitok a nagduduma ti buya da, addaanda iti esmalte, ket nadibujuan da iti nakaay-ayo ken nakaskasdaaw a kas kadagiti pagramramenda sadi Arabia.
Ni Simoun inngatuna ti bandeja ket inparangna ti sabali a napunno kadagiti ingget taraki nga al-alajas a makaanayda kuma a nangpennek iti essem ti pito a babbalasang iti bayat ti pito a rabii a salsala a maipaay a pammadayaw ka dakuada. Nadumaduma a kita nga agdidinnayo iti kinasayaat, nakatartaraki a panaglalaok dagiti batbato ken perperlas a kas da sinan babassit-usit nga agtaytayab a ti bukot da bumalbag ket dagiti paypayak da nga apagrusing kasda agsalsalagasag; ti sapiro, ti esmeralda ti rubi, ti turkesa, ti brilyante agtitipunda a mamagbalin kadagiti sinan kalammot, kulibangbang, alumpipinig uyukan, barrairong, uleg, tekka, ikan, sabong, sanga, kdmpy. . . adda sagaysay a sinan balangat, gargantilya, ukkor (kollar) a perlas ken brilyante a kasta una nagsayaat. ta dagiti babbalasang, iti siddaaw da, dida nagawidan ti dilada a nagkuna iti; japo, anian! ket ni Sinang pinagsaltekna ti dila na, nga iso ti gapo na a ni ina na, ni Kapitana Tika, inna kinuddot, ania la ket ta iso ti pangigapuan ti aglako a mangipangina kadagiti al-alajas na. Ni Kapitana Tika kudkuddutenna pay laeng ti anak. na, uray idi nalpasen a nagasawa.
—Addagitada man birbrilyante a kadaanan,—kinuna daydi joyero;—dayta singsing ita, kukua daydi prinsesa sadi Lam-
