mira, pelilädoms e ut söla Arnold Scherzinger, plofed in Portland; bepükam lonedik esukom penedi lätik teföl löpef gitik in dins volapükik. Düp 5id lasam pefözogom jü vendel.
Koköm vendelik ezitom komü publüg gletik, kele s. Hutchins ebitopom pükalis. Söl Sprague eseplänom stukami e zeili volapüka, täno s. Post epükatom dö mostep ata; plisenels elenililoms pükatis at klatik ko nited legletik e examoms täno kumi levemik literata volapükik peblimöl fa kopanans.
Siedäm denuo pemanifom fa lecif Sprague düp 10id büzendela suköl. Penod lenitedik söla Thurston, de Providence, pelilädom fa lepenädan; pemobos e pesludos fa lasamef, das lepenädan sepetom lautele dani lasamefa plo penod nitedik at; otos pesludos tefü penods sölas French, Dailey e Wilson.
Bepükam denu pelasumöl tefü löpef gitik in dins volapükik edagetom seniti e nitedi legletik lasamefa. Söls Sprague, Earle, Post, Hutchins epükoms tefü yeg at e na bepükam lefulnik Huebsch edalofom mobi suköl: “Konsidü atos, das volapükaklub nolümelopik diseinom te fetanön melopikanis valik gönöl döli püka bevünetik, ab no büedön lobedi, ni mosumön libi, pasludos atoso, das sludot de VIIIul 22id 1890: ‘Läsevobs as löpefi gitik tefü dins pükik kademi volapüka pestaböl fa kongefs de München e de Paris, e plösenöl züpelis e gebelis püka in läns valik’ paliunom.” Mob at pelensumom e klub evedom atoso velato nepaletik e egetom stadi libik vönik.
Mob suköl söla Hutchins, peyuföl fa s. Earle, pelensumom: “Komedobs gebami e pakami stüla balik volapüka nen netims e kompligs.”
Sukü nun lepenädana, das klud enelabom calabledi sis nüm 10 gaseda “Volapük” s. Sprague enunom , das s. Huebsch isiagom pübön calabledi, e das lofom tiädi “Volaspodel” plo ot; sukü mob söla Earle dan kluba pesepetom söle Huebsch demü lof gudlik oma, e dilekef pekomitom, lenleodön calabledi somik. Bepükam tefü fom bleda esukom täno e pesludos, das te volapük pogebom in bled at.
Sukü mob söla Hutchins dilekef pekomitom, plepadön e pübön sezüki melijik dunas lasamefa at.
Söl Post elänotom, das spad pesefom in tabled daükik setopama ozitöl in Chicago in yel 1893 diseinü setopam volapükik e ebegom, das kopanans e votiks nunoms lepenädane nümi e tiädi vobukas, kelis kanoms sedön al setopam, sodas sevälam kanom pamekön e das no samäds tumödik sota bal obinoms us. Söl Shoemaker in Chicago okudom vobukis pesedöl. Lasam pefözogom jü pozendel.
Siedäm pemanifom denu düp 3id pozendela. Söl Earle emobom, denuvälon bavoögiko sölo Charles E. Sprague as lecifi, e söli F. L. Hutchins as lepenädani plo tüp yelas kil suköl. Söl Sprague etapükom mobi at sagöl, das nu semvotim pavälomöd as lecif, mans so
