Parab
Fo leyan süla ‚Petrus‛ ästanom, ed älogedom donio ve veg skapik, kel äzugon de tal lü top beatanas. Äbinos latik ün del, e büä äfärmükom leyani vetik, äzilogom, va nog belödans tala äkömons, kels ädesirons ad nügolön ini reigän sülik. Töbiko äföfiostepölo mageds vomik tel änilikons. Jibalan, kel äbinof klülabiko pösod gredäta löpik, äföfiotränof oki nevifiko, ed äjinof binön vemo fenik; jivotan: vom gredäta vobanas, ästeifof, vio fenik äbinof,vemöfiko ad fokömön votanik, ed ad blebön foik. Ko küpäl gretikün ‚Petrus‛ äküpedom telanefi, e loged sevärik omik äsofikon, ven ädrefon dü timil logodi löfik glumaladälik jipatritana. Tio leigüpiko älükömofs leni sülaleyan, e vom lupöpa ävokädof ko vög tulöpöfik: „Ob dalob ninikön büiküno, binob vom, kel ekosididob me namavob, eletöbidob pro himatan döfik obik e pro cils: pöfan buon in reigän sülik“.
„So! so!“ ‚Petrus‛ ägesagom takediko, e lü votan äspikom: „Ed ol-li? Kisi edunol-li?“
„No eletöbidob me nams obik, ibä ädalabob moni anik; ven äbinob nog vemo yunik äperob yunafleni obik; ekälob palis malädik obik jü deadam onas; pos atos edunob vobodi sogädik; ai ebinob soelik.“
E ‚Petrus‛ äsagom vome vobanik: „Ebinol-li läbik ko himatan e cils oliks?“
„Si! vemo läbik.“
„E cils olik elöfons-li vemo oli?“
„Mu mödiko, ed ob onis.“ E lifaläb pijuitöl ästralon, ed älogoton se logodalienäds ofik.
E ‚Petrus‛ äsäkom daute patritik soelöfik: „Ed ol-li? ebinol-li läbik?“
„Nö! elabob senäli kotenikama sekü vobod pefölöl, pos yel 21id obik no esenälob läbi. Vegam obik äjenon in jadaflan lifa.“
E ‚Petrus‛ ädönuspikom lü vom vobanik: „Sagol: pöfikünan buon in reigän sülik. Siobsös, das binos soik! Ab sagolöd obe! Kif olas äbinof-li pöfikün?
Ven änüstepol soaro ini löd balugik ba pöfädik olik, himatan olik äpladom blümio stuli pro ol, tän cils löfik lefredik äbradons me bradils oksik särvigi olik, e rein kidilas ädrefon logodi olik.
E ven of äkömof soaro feniko ini lom okik, tän ägifof tiedi se tiedaskal largentik, si! ab nek äpladom blümio stuli pro of. Nek äsagom flenöfiko: soö! binol-li us? Cilabradils nonik, cilakidils nonik! Stil visipöl in cem no pebelödöl ädabinon.
E nu gesagolöd obe, kif olas ebinol-li pöfikün?“
E jemiko vobanavom äspikof nelaodiko, du ägestepof ko dalestüm keliedöl: „Äbinof pöfikün, ag! o ‚Petrus‛! leadolöd bugolön ofi!“
Se Volapükagased pro Nedänapükans 1951, Nüm: 5, Pads: 17-18.