Parabola del Figliol Prodigo BAD (Flatscher)
Parabola del Figliol Prodigo BAD
N zerto om â dui fis, y le plü jonn de chisc dij a so pere: déme la pert de facolté che me toca, y ël i á partí süa facolté. Y da iló a püc dis, abiné ch' al â le fi plü jonn döt inadöm, s' un él jü demez te n paisc forstí, y iló ál desfat ia le fat so cun vire alingrana. Y despó ch' al s' á desfat ia döt, él gnü na gran fan en chël lüch, y al scomëncia d' avëi mangora dl bojëgn. Y s' un é jü, y se mët pro un dla cité de chël lüch y chësc l' á metü söl so mesc a vardé i porcí, olach' al orô se paré la fan cun chël, che mangiâ i porcí, y degügn ne i un dê.
Y gnü en se stës dijôl: cotan de fanc en ciasa de mi pere nen él, che á pan da mangé assá, y iö möri chiló da fan. Oh! i ó tó ca, y jí da d' ël y dí: I á picé dant a Idî y dant a os. Iö ne sun plü dëgn d' ester tlamé (nominé) osc fi, toleme demó sö sciöche un d' üsc fanc. Al leva sö, se mët a jí da so pere, y canch' al fô ciamó dalunc, so pere le vëiga a gní, i salta incuntra, y l' abracia, y le baja, y le fi dij: I á ofenü Idî y ince os, y ne sun plü dëgn d' ester tlamé osc fi. Le pere dij a sü sorvidus: prësc portede la plü bela iesta, y meteila indos, déi l' anel tl dëit, y i cialzá ti pîsc, despó condujede ca n bel videl gras, sbocarile, che orun fá n past, porcí [che] chësc mi fi é inciamó vi y intun, che nos tignîn por mort. Y ai scomëncia le past. Intratan vëgn le fi plü vedl dal ciampopré, y tl rové daimpró a ciasa, sëntel a soné y a cianté. Al chërda un di sorvidus, y damana ci che al é. Al respogn: al é gnü to fre adalerch sann. Sön chësc se dessënel y ne n' ó plü jí en ciasa, a tan che á spo messü gní fora so pere a le perié: mo al i respogn ad ël: Ciarede, iö ves servi da tan d' agn, y ne s' á mai dejobedí, cun döt chësc ne m' ëis' mai dé n asó da mangé cun mi compagns (amisc), y sëgn che al é gnü chësc osc fi, che á desfat ia döt le fat so coles scroes, i fajëise sbocarí n videl mioré. Le pere respogn a so fi, mi bun fi, tö t' es dagnora chiló cun me, y döt le fat mi é to; al fô bëgn debojëgn de fá n past, y s' la gode, porcí ch' al é gnü chësc to fre sann y intun, ch' an cherdô pordü y mort.