Paudeen Foughlaan's Weddeen

PAUDEEN FOUGHLAAN'S WEDDEEN.

Chull zing o ee weddeen o Paudeen Fouglaan,
Fho laately godh tackled to Kakeen Lurkaan,
Shoo bin vrem Vorth, an hea vrem Bargee,
An aul aar vrienes haad a graat spree.

Yola Vather Deruse, hea raaye cam aare,
Wi buke an wi candale hea tackled ee paare.
"Gud bless thee mee gurles," hea zeid, "oan an aul."
An Paudeen hea gae her a michty smugal.

Aar was bawkoon an gaubaages, breed, an kippeens,
An potteen galore ing koanes an noggeens,
An Vather Deruse zeid "Leth na oan gedh drunk."
Yet spite o hays praachin ee mugges thye zunk

Aar was yola Jem Mahony, a noted pipeare,
An a videl ee-scraaped bee blin Billy Myleare,
Thye godh upa dance wi lyght haades an heeles,
An pranced awi to jigges an to reeles.

Ee Vidleare hea shudled wi haade to a vall
An smithered hays videl, bow, stringes an aul;
Ee Pipeare vell bak lick oan ing a smote,
An a kaud adh ee bigpeep an a tyel o hays coat.