Pened Volapükanes de cifal: ‚Jakob Sprenger‛
- O Volapükans löfik obik!
Sekü büad cifala lestimik büik: ‚Prof. Dr. Albert Sleumer‛ in ‚Bad Godesberg‛ len ‚Rhein‛ binob sis 1948 gustul 16 fovan omik in cal at, keli fe no ebesteifob, ab demü dinäds patik emutob dasumön, ad neletön, das neplits nulik ödavedonsöv.
Volapük löfik obsik edulifon sis kongred Volapükik telid in ‚München‛ e go pato sis kongred kilid in ‚Paris‛ timis fikulik. Seks feitas at äbinons, das mödot sitas mätedöl äsüikon. Zuo monameds zesüdik ädefons pö mastan stimabik obsik: ‚Johann Martin Schleyer‛, datuval Volapüka, ad davobön fovo Volapüki, e bu val ad fimekön vödabuki gretik. Döfs bälda, läsikam logamafäga äläikons, ämalädikom ed ädeadom tü 1912 gustul 16.
Fovan balid, as cifal Volapükanefa, äbinom söl: ‚Prof. Dr. ALbert Sleumer‛ in ‚Bad Godesberg‛, keli datuval lestimik Volapüka ijonidükom ya ün dekul yela: 1910 asä fovani okik üfü deadam oka. Timadinäds pro dun frutik pro Volapük ävedons ai negönikums. Volakrig balid de 1914-1918 äsplodülon ed äkodon brulis bolitik e konömikis in Deutän ed i in läns votik. Süikam netasogädima äjafon Volapüke nefleni nulik, bi äbekomipon duni bevünetik alik, e sosus idüton oke nämädi, i äproibon duni at. Täno volakrig telid: 1939-1945 äkömon, kel jiniko ägevon Volapüke deijoki. Ab jenöfo no äbinos so. Num menas in läns difik go stilo ga iblebon fiedik kol Volapük. Bevü ons bu val Nedänans, asä melans, äbenodistükons okis. No älüvons nafi jiniko äsadöli, ab ävobons kobü cifal Volapükanefa pö davob Volapüka, pö kelos ‚Dr. Arie De Jong‛ eduinom ledilodi pö davob vemöfik plu 30-yelik vödabuka. Atos digädon ad padakipön in yelabuks Volapüka.
Ab i votöpo ijäfoy stilo me datuvot ela ‚Schleyer‛. Löpo in bels Jveizänik „Lelivükamafed bevünetik“ (pebrefüköl: „Lf. b.“) istetom stigädamü fünan okik Volapüki di ‚Schleyer‛ asä suemükamamedömi calöfik bevü limans distapükik. Bagaf tefik in statuds onik ätonon:
„Asä suemükamamedömi Lf. b. gebon mekavapüki. As pük pötikün palonülon Volapük, soäsä söl: ‚Johann Martin Schleyer‛ in ‚Konstanz‛ eposbinükom oni timü deadam okik. Lonöfon as pük neceinovik ad büoneletön smalotülamamögis.“
Ün yel: 1929 cifal Volapükanefa: ‚Dr. Albert Sleumer‛ e kadämal Volapüka: ‚Dr. Arie De Jong‛, ettimo in ‚Voorschoten‛ (Nedän) ävisitoms dispenani asä fünani ä sekretani Lfa b., ad bespikön kobovobi fütürik. Balädikam älevedon, ab pädeimon fa cifef Lfa b., bi ätefos Volapüki perevidöl, kelos ätaöfon ta statudabagaf löpo pemäniotöl. Dispenan ädagetom ye pos töbidam vemöfik, das bagaf pemäniotöl pävotükon ini fom sököl:
„Asä mekavapük pötikün pelonülon Volapük prelatala: ‚Johann Martin Schleyer‛ ko däl Volapükakadäma fa ‚Dr. Arie De Jong‛ perevidöl ä pedavoböl.“ Siso dispenan, asä sekretan Lfa b., vobom kobo pro Volapük perevidöl obsik.
Glidob kludo, asä cifal kilid Volapükanefa ä dilekan VOlapükakadäma, fredo Volapükanis valik, kels eblebons fiediks, sevabo e lü ob sevädikis in Lf. b. ed i slopanis sevädik e nesevädikis Volapüka obsik plödü noganükam at. VIlobs kobovobön fovo, to neletians konömik e bolitiks, nedemölo utosi, kelos jenon deto e nedeto zü obs; ibä in baläl nämäd dabinon, du teläl te vobädon distuki. Atosi paset elejonon obes.
Dan duton lü utans valik, kels dü degyels mödik efiedons kol Volapük, e so esäglömädükons oni. Donastad pebemastikon. Nu golos, if God vilom osi, dönu löpio. Lifonös Volapük!
- Cifal Volapükanefa:
- JAKOB SPRENGER.
Volapükaklub valemik Nedänik: Doküms
Se Volapükagased pro Nedänapükans 1949, Nüm: 1, Pads: 1-2.