Pened de ‚Paulus‛ Galatiyänanes

KAPIT: I

‚Paulus‛: paostolan no pevoköl ma vil menas, ni fa men, ab fa Yesus: Kristus e God: Fat, kel elelifükom omi se deadam,
e svists valik, kels binons lä om, komotes Galatiyäna.
Benäd binonös lü ols e püd Goda: Fat e Söla obsik: Yesus Kristus,
kel egivom oki it demü sinods obsik, ad lelivükön obis se vol badik atimik ma vil Goda ä Fata obas!
Lü om glor binonös jü ün laidüp valik! So binosös!
Stunob, das edeflekols olis so suniko de utan, kel evokom olis in benäd Kristusa, ad slopön gospuli votik.
Gospul votik no dabinon. Ab somans dabinons, kels kofudükons olis, e vilons miükön gospuli Kristusa.
Ab, va obs u va silanan se sül binobsöv utan, kel predom oles gospuli, kel deikon de ut, keli obs epredobs, pamaleditomöd!
Äsä enotükobs büiko, e nu dönusagob, if ek predomöv oles bosi votik, äsä uti, keli egetols, pamaleditomöd!
Konfidob-li nu menis u Godi? u steifob-li ad plitön menis? If plitoböv menis, tän no binoböv dünan Kristusa.
Lesiob oles, o svists! das gospul fa ob pepredöl no licinon de men;
no elovesumob, ud elärnob, ga oni de men, ab dub dasevädükam Yesusa: Kristus.
Elilols ga, vio ekondötob, ven nog älifob in yud, das epöjutob tuvemo komotis Goda, ed epäridükob onis;
e das ob as yudan äpluob leigodü mödikans timakompenanas pöpa obik, bi äbinob lezilan nog gretikum stidas büröletanik obik.
Ven nu God, kel evälom ed evokom in benäd okik obi de vüm mota obik, äplidom
ad dasevädükön Soni okik in ob, dat öpredob omi paganes, no edunob sunädo ma lüäl ninälik oba,
e no egolob lü ‚Hierusalem‛ lü utans, kels äbinoms paostolans bü ob, ab edegolob lü Larabän, ed egegolob usao lü ‚Damascus‛.
Latikumo pos yels kil egolob lü ‚Hierusalem‛ ad visitön eli ‚Petrus‛, ed estebob lä om dü dels deglul.
No elogob paostolani votik, ab sio eli ‚Iacobus‛: blod Söla.
Ekö! tefü utos, kelosi penob oles, temunob lo God, das no lugob.
Pos atos egolob lü topäds Süriyäna e Kilikiyäna.
Pösodiko no äbinob sevädik pö komots Kristusa in Yudän;
ililons te, das utan, kel ipöjutom onis büiko, nu äpredom lekredi, keli ettimo isteifom ad päridükön,
ed äglorükons Godi in ob.

KAPIT: II

Latikumo mö yels degfol egolob dönu ko ‚Barnabas‛ lü ‚Hierusalem‛, du i äkesumob eli ‚Titus‛.
Ägolob sekü dasevädükam, ed äloseidob gospuli, keli notükob paganes, lü mens, pato lü mans cädik; dat no kömobös, ud ekömobös vaniko!
Ab igo ‚Titus‛: Helänan, kel äbinom lä ob, no pämütom ad leadön säprepüdön oki.
Toä hisvists dobik pinüdugöl ädabinoms, kels inükömoms ad vestigön libi obsik, keli labobs in Kristus: Yesus, ad sumätükön obis.
No eyilidobs ye dü timül demü oms, no esumätükobs obis, dat binäl voik gospula pokipedonös pro ols!
Tefü utans, kels cedoms okis cädikis, kis ebinomsöv büikumo, atos lindifon pro ob; (God no demom logoti mena). Mans cädik et igo no ebligädoms obe bosi.
Güö! ven älogoms, das notükam gospula prepüdilabanes pilükonfidon obe, äsä ut säprepüdäbes ele ‚Petrus‛,
(ibä om, kel egivom ele ‚Petrus‛ nämi pro paostol bevü säprepüdäbs, egivom i obe nämi pro paostol bevü pagans),
ed ädasevoms benädi, kel pigivon obe; ‚Iacobus‛, ‚Cephas‛ e ‚Ioannes‛, kels palecedoms stabakölüms, etenükoms detanami oksik lü ob e ‚Barnabas‛ as mal kobäda, das obs ögolobs lü pagans, ed oms lü utans, kels pesäprepüdoms;
te obs ödesinobs ad mebön pöfanis: bos, keli ai edunob leziliko.
Ven nu ‚Petrus‛ ikömom ini ‚Antiochia‛, äbitikob notidiko ta om, bi äbinom blamabik.
Ibä büä lesedäbs anik de ‚Iacobus‛ ikömoms usio, äkefidob ko pagans, ab ven atans ikömoms, äsoalükom oki ed äsoelikom, bi ädredom demü säprepüdäbs,
e yudans votik äkesimuloms ko om, sodas igo ‚Barnabas‛ päketirom dub simul omsik.
Ab ven älogob, das no äkondötoms ma binäl voik gospula, äsagob lo valans ele ‚Petrus‛: If ol, kel binol yudan, lifol ma süds pagik, e no ma yudiks, lio kanol-li mütön paganis ad lifön as yudans?
Obs, kels binobs motedo yudans, e no sinans de licin pagik,
sevölo, das men no pagidükon dub näm lonema, ab dub lekred in Yesus: Kristus, elüsumobs lekredi in Yesus: Kristus, dat pagidükobsös se lekred Kristusa, e no se näm lonema; bi nek kanon pagidükön dub näm lonema!
If obs, steifölo ad pagidükön in Kristus, ga klülädobs binön sinans, Kristus üfo binom-li bo dünan sinoda? Fümiko nö!
Ibä, if löbumob dönu uti, keli edistukob, tän sevädükoböv obi it asä nefölani.
Ibä sekü lonem edeadob lo lonem, ad lifön in God. Ko Kristus pekekrodob.
Nu ob no plu lifob, ab Kristus lifom in ob. Dü tim, kü lifob in mid, lifob in lekred Sona Goda, kel elöfom obi, ed egivom oki pro ob.
No nestümob benädi Goda; ibä if gid padagetonöv dub lonem, tän Kristus edeadomöv-la vaniko.

KAPIT: III

O Galatinänans fopik! Kin ebemagivon-li olis, [das no kredols verati], ols, keles Yesus: Kristus pebepenom as krodäb fo logs olsik?
Dini bal at vilob lelilön de ols: Egetols-li Lanali dub vobods olsik ma lonem, u dub lüsum lekreda?
Binols-li üfo so fopiks? Posä eprimols ko Lanal, finikols-li nu ko mid?
Eplakols-li vaniko dini so gretiki? Ifi ibinosöv vanik.
Benö! om, kel eblinom oles Lanali, e kel eduinom milagis pö ols, dunom-li atosi dub vobods lonema, u dub predam lekreda?
Leigo äsä ‚Abraham‛ «elekredom Godi, ed atos pekalükon ome as gidükam».
Sevols kludo, kels binons in lekred, utans binons cils ela ‚Abraham‛.
E bibapenäd, äbüologöl, das God ögidükom paganis sekü lekred, egevom büo ele ‚Abraham‛ promi: «In ol nets valik pobenedons».
So utans, kels slopons lekredi, pobenedons ko ‚Abraham‛ lekredöl.
Ibä valans, kels slopons lonemi, sumätöfons lü maledit. Ibä pepenos: «Alan pamaleditonöd, kel no fölon utosi valik, kelos pebüdülon in buk lonema»!
E das nek pagidükon fa God nämätü lonem binon kleilik, ibä «gidan olifon sekü lekred».
Lonem no demon lekredi, ab «utan, kel dunon dinis at, olifon dub ats».
Kristus elivioremom obis de sumätöf lü maledit, dubä evedom maleditäb demü obs, (ibä pepenos: «Alan pamaleditonöd, kel palägon len stafäd»!)
dat bened, kel pegevon ele ‚Abraham‛ pareifonös me Kristus: Yesus paganes, dat getobsös dub lekred promi Lanala!
O svists! spikob nu ma geböf menik, binos äsä baläd menik pezepöl, nek kanon nelonöfükön oni, u läükön bosi lü on.
Proms nu pegevons ele ‚Abraham‛ e posbinükäbe omik. No pesagos: «e posbinükäbefe», äsä: mödikanes, ab balane: «e posbinükäbe omik», sevabo: Kristuse.
Nu lesagob atosi: baläd, kel pezepon büo fa God lü Kristus, no kanon pasälonöfükön dub lonem, kel edavedon pos yels foltumkildeg, sodas prom pöfinidonöv.
If nu gerot sekidonöv de lonem, tän no plu sekidonöv de prom. God nu egevom promi benädiko ele ‚Abraham‛.
Kisi täno lonem sinifon-li? Pelasumon demü lonam nefölotas, jüs posbinükäb ükömom, kele prom pigevon, pebüdülon fa silanans, e pegivon medamü medan.
Nu medan no biton pro pösod bal, e God binom Dabinal bal.
Lonem taon-li üfo ta proms Goda? Lenö! Ibä if lonem pigivonöv as ut, kel fägonöv ad jafädön lifi, tän jenöfo gid sekidonöv de lonem.
Ab bibapenäd ekobosumon vali, kel binon sinik, dat prom sekü lekred in Yesus: Kristus öduton lü lekredans.
Büä lekred äkömon, pipladobs e pikipobs sumätöfü lonem pro lekred, kel pönotükon;
so lonem ebinon dugälan obas, ad dugön obis lü Kristus, dat pögidükobsös dub lekred!
Nü lekred ekömon, no plu binobs sumätöfü dugälan.
Ibä ols valik binols cils Goda dub lekred in Kristus: Yesus.
Ibä dubä peblunedols in Kristus, evedükols olis kritanis.
Lindifo va binol yudan u Helänan, slafan u liban, man u vom; ols valik binols bal in Kristus: Yesus.
Ed if dutols lü Kristus, tän i binols posbinükäbs de ‚Abraham‛, e sekü prom gerans.

KAPIT: IV

Nu sagob: dü tim, das geran binom tütäbik, leno distom de slafan, do binom söl vala,
binom ga sumätöfü tütans e guvans jü timül fa fat büo pelonöl.
So i obs, ven äbinobs tütäböfiks, päträitobs as slafans pö runäms levala.
Ven nu tim pötik ikömon, God elesedom Soni okik, pemotöl fa vom, kel äbinof sumätöfü lonem,
dat ölivioremomös utanis, kels binons sumätöfü lonem, ed obs ödagetobsös cilami!
Bi nu binols cils, God elesedom Lanali Sona okik ini ladäls obsik, kel vokon: ‚Abba‛! o Fat!
Klu binol no plu slafan, ab cil, ed as cil geran [Goda dub Kristus].
Sio büikumo, ven no äsevols Godi, edünols natanämis, ab ats no binons gods.
Nü eseivols Godi, si! nog plu! nü pedasevols fa God, lio kanols-li geflekön olis lü runäms fibik ä pöfädiks ets, e vilön dünön, äsä ün tim büik, dönu onis?
Demols kuratiko delis, mulis, pötatimis, yelis.
Dredob demü ols, das ga etöbidob vaniko pro ols.
Lebegob oles: Vedolsöd äsä ob! o svists! bi ebinob i äsä ols. Kol ob it no enegidols.
Sevols ga, das pö naed balid, enotükob oles gospuli, ven äbinob malädik,
e to stad koapik obik, kel äblufon olis, no enestümols ni enaudols obi, ab elasumols obi, äsä silanani Goda, si! äsä Kristusi: Yesus.
Kiöpo beat, keli äsenälols, eblibon-li? ibä kanob temunön tefü ols, das, if atos äbinonöv mögik, isetirolsöv logis olsik, ed igivolsöv onis obe.
Evedob-li üfo neflen olsik, dubä enotükob oles verati?
Leziloy mi pro ols, viloy fakipön olis de obs, dat lezilolsös pro ons!
Binos gudik ad lezilön ai pro din gudik, e no te, ven binob lä ols.
O cils obik! demü kels sufob dönu ledoli, jüs Kristus udagetom dönu magedi in ols.
Viloböv ebo nu binön lä ols, e spikön lü ols me vögäd votik; ibä binob lebluvik tefü ols.
Sagolsöd obe, ols, kels vilols binön sumätöfü lonem! No dalilols-li lonemi?
Pepenos ga, das ‚Abraham‛ älabom sonis tel, bali lä jidünan, e bali lä jiliban.
Ab utan se jidünan pemotom komuno ma mid, e votan sekü prom.
Atos muton pasuemön sümboliko. Ibä sinifos diatekis telsotik; bal licinom de bel: ‚Sinai‛, kel prodon sumätöfanis; atos ‚Agar‛ binof.
Jiatan [‚Agar‛] nu binof el ‚Sinai‛: bel in Larabän, kel baibinon ko el ‚Hierusalem‛ nuik, kel ko cils okik binon sumätöfik.
Ab el ‚Hierusalem‛ sülik binon libik; at binon mot obas.
Ibä pepenos: «Fredolöd! o nefluköfan! kel no motof; yubolöd, vokädolöd! ol, kel no labol doledis! ibä num cilas lüväba binon gretikum, ka ut jiutana, kel labof himatani».
Obs, nu, o svists! binobs cils proma, äsä ‚Isaac‛.
Ab leigoäsä ettimo, utan, kel komuno ma mid pefatom, äpöjutom utani, kel pefatom ma lanöf, so jenos ün atim.
Ab kisi bibapenäd sagon-li? «Mofolöd jidünani e soni ofik! ibä son jidünana no obinom kegeran sona jilibana.
Klu, o svists! no binobs cils jidünana, ab jilibana.

KAPIT: V

Kristus elibükom obis lölöfiko; klu laidälolsöd, e no pladolsöd olis dönu disi yok sumätöfa!
Ekö! ob: ‚Paulus‛ sagob oles, if leadols säprepüdön olis, tän Kristus no ofrutom olis.
Dönu lesagob mene alik, kel leadon säprepüdön oki, das labon bligi ad fölön lonemi lölik.
Ols valik pelivükols de Kristus, kels cedols olis pegidükölis in lonem. Benädi eperols.
Ibä spetobs dub Lanal speli gidükama sekü lekred.
Pro utans, kels lekredons in Kristus: Yesus, säprepüdam no lonöfon, i no prepüdilab, ab lekred, kel notädon löfi.
Eprimols gudiko dajäfi. Kin estöpädon-li olis, sodas no plu dunols ma verat?
Das no dunols atosi, no evedos dub om, kel vokom olis.
Mödot smalik lefapesta züdöfükon pesti lölik.
Nämätü Söl konfidob, das baivögols ko ob. Alutan, lindifo kin binonöv, kel kofudükon olis, opolon micödeti.
Obo, o svists! if predoböv dönu säprepüdami, sekü kis üfo nog papöjutob-li? Tän skän krodama pemoükon.
Panegenükomsöd utans, kels volutükoms olis!
Ibä pevokols libio, o svists! Ab no gebädolsöd libi demü desirs midik, ab dünolsöd ko löf odis!
Ibä lonem lölik binädon me vöd bal at: «Sötol löfön kemeni olik, äsä oli it»!
If beitols e slugols odis, kälälolsöd täno, das no päridikols dub ods!
Sagob kluo: Kondötolsöd lanöfiko! e no fölolsöd desiri mida!
Ibä desirs mida taöfons ta uts lanöfa, ed uts lanöfa ta uts mida; ats taons ta ods, sodas no dunols utosi, kelosi vilols.
If padugols dub lanöf, tän no binols sumätöfü lonem.
Vobeds mida nu binons kleiliks, sevabo: dulter, nepued, nesüdöf, nestön,
lugodikult, magivam, neflenam, zan, jalud, zun, mäted, teläl, paletöf,
glöt, sasen, briet, zäls nestönik, e somiks. Tefü atos büosagob oles, äsä ya ebüosagob oles büikumo, das utans, kels dunons dinis somik, no odagetons regäni Godik.
Ab prod lanöfa binon: löf, fred, püd, sufäd, flenöf, gud, konfidov,
sofäl, okreig. Pro utans, kels labons atis, lonem no dabinon.
Utans nu, kels dutons lü Kristus, ekrodons midi ko lefäks e desirs oniks.
If lifobs lanöfiko, tän i dajäf obsik binonöd lanöfik!
No binobsöd lupleidiks, no letodobsöd odis, no nebönobsöd odes bosi!

KAPIT: VI

O svists! if ek paküpodon pö nefölot, tän ols, kels binols lanöfiks, mutols jonön one ko sofäl vegi verätik, kälälölo, das ol it no pasufodolös!
Pololsöd fledis odsik, e fölolsöd so lonemi Kristusa-
Ibä if ek lecedon oki, das binon bos, do binon nos, tän cüton oki it.
Alan xamonöd dunis lönik okik, e pleidülonöd demü ats lo ok it, e no lo votan!
Alan polonöd ga fledi lönik okik!
Utan, kele vöd patidon, kompenükonöd nu pö dins valik utani, kel tidon one!
No pölolsöd! God no leadom kofön oki. Ibä kelosi ek sovon, utosi ofodon.
Kel sovon midiko, utan ofodon sekü atos päridikami; kel sovon lanöfiko, utan ofodon sekü atos lifi laidüpik.
No slapobsöd pö dun gudikosa; ibä ofodobs pötatimo, if no trögobs.
Dunobsöd kludo gudikosi valanes, nü nog labobs timi, ab mödiküno lekredakompenanes!
Logolsöd, ko tonats vio gretiks epenob oles lönanamiko!
Utans, kels viloms labön logoti gudik mütoms olis ad leadön säprepüdön olis, efe te ad no papöjutön demü krod Kristusa.
Ibä mans pesäprepüdöl et it no föloms lonemi, ab viloms, das pasäprepüdols, dat kanomsös pleidülön demü atos!
Obo, leno vilob pleidülön demü bos votik, äsä demü krod Söla obsik: Yesus Kristus, demü kel, vol pekrodon lo ob, ed ob lo vol.
Ibä pro Kristus: Yesus ni säprepüdam, ni prepüdilab labon völadi anik, ab sio dabinan nulik.
E pro valans, kels kondötons ma nomem at, püd e miser binonsös, ed i pro Yisraelän Goda!
Fovo nek töbonös obi! bi polob skaris Yesusa in koap obik.
Benäd Söla obsik: Yesus Kristus binonöd in lanöf olsik! o svists! So binosös!

(At pepenon Galatiyänanes se ‚Roma‛)

---------- oOo ----------

Ninädalised