Pened de ‚Paulus‛ elanes di Philippi

KAPIT: I

‚Paulus‛ e ‚Timotheus‛: dünans Yesus: Kristus lü saludans valik in Kristus: Yesus tö ‚Philippi‛ ko kälädans e diakans onsiks.
Benäd e püd binonsös lü ols de God: Fat obsik, e de Söl: Yesus Kristus!
Danob Godi obik alna, kü betikob olis.
Pö plek alik, keli dunob, ai plekob fredo pro ols valik,
das de del balid jü timül at kompenols pö gospul.
Süadob, das om, kel eprimom vobodi gudik at in ols, ofidunom oni jü del Yesusa: Kristus,
ibä binos ga gidik, das tikob so tefü ols valik, bi polob in ladäl obik olis, kels valik, e ven pijänädob, e pö paolog obik, e pö fümükam gospula, binols kekompenans benäda obe pelegivöla.
Ibä, God binom temunan oba, das desirob lü ols valik ko leladöf Yesusa: Kristus.
Ed atosi plekob, das löf olsik bundanikonös dub dasev e plaks lanöfik valasotik!
das daseivolsös disti vü gud e bad ad binön rafiniks e neskäniks jüi del Kristusa!
e das fulolsös me gid dub Yesus: Kristus pedagetöl, ad glor e lelob Goda!
Vilob, das sevols, o svists! das utos, kelosi eplakob, evedon föd gospula,
sodas legalädanef e votans valik sevons, das fanäbob demü Kristus,
e hisvists mödikün dub fanäbam oba edagetoms konfidi in Söl ad spikön nenplafo vödi Goda.
Semans dunoms fe atosi sekü glöt e feitiäl, ab votans sevädükoms plidiko Kristusi,
semans sekü löf, bi sevoms, das pecälob ad jelodön gospuli;
ab votans sevädükoms Kristusi sekü feitiäl, no ko disein klinik, cedölo ad vemükön dub atos fanäbam obik.
Ab demädi kinik atos labon-li? alo, va jenos ko kodül ud in verat, Kristus pasevädükom; demü atos fredob, ed obleibob fredön.
Ibä sevob, das atos ofinikon ad beat oba dub plek olsik e keyuf lanana Yesusa: Kristus.
Ledesiro logob lü fütür, e spelob, das spet leno paläseton, ab das Kristus, äsä büikumo i nu, paglorükom in nenplaf lölöfik dub pösod obik, lindifo va atos ojenon dub lif u dub dead oba.
Ibä lif binon pro ob Kristus, e dead gaen.
If mutob bleibön lifön, tän atos binon pro ob: vobön frutiko. Klu no sevob, kisi mutob välön.
Padränob lü flans bofik; desirob ad mogolön ad binön ko Kristus, bos kel binon vipabikün,
ab bleibön lifön binos zesüdikum demü ols.
Bi cedob, das atos binon soik, sevob, das oblibob, si! oblibob lä ols valik, demü föd e fred lekreda olsik,
dat glorükolsös bundaniko Kristusi: Yesus lo ob, ven okömob dönu lü ols!
Ab demolsöd dini bal! Kondötolsöd dinitiko me gospul Kristusa, dat, va kömob e logob olis, va mobinob e lelilob dinis tefü ols, sevobös, das laidälols in lüäl bal, das binols baläliks in lekred gospula!
e das leno pabluvükols fa taans (atos obinon lü ons malot päridikama, e lü ols ut sava, efe de God).
Täno ga benäd pelegivon oles demü Kristus, no te lekred in om, ab i däl ad sufön pro om,
ed omutols komipön in komip ot, in kel eloegols komipön obi, e tefü kelos nu lelilols, das komipob.

KAPIT: II

If nu bevü ols trod in Kristus, kuradükam dub löf, svistam lanöfik, ladöf e miser dabinons,
vedükolsöd täno fredi obik lölöfiki me baläl, me löf ot, as mens labü lan bal, labü lüäl bal,
kels no lülogons odis ko zaniäl u magifiäl, ab kels lecedons ko mük odis asä utanis, kels pluons leigodü oks it,
e no demölo demädi lönik, ab i uti votana.
In ols meug ot binonöd, kel i äbinon in Kristus: Yesus!
kel, do älabom magedi Goda, no äzeilom ad lüsumön leigi oma,
ab änoädom oki, dub lasum mageda hidünana, ed ad vedön logoto men.
Ed om, petuvöl in maged mena, ädonükom oki, ed ävedom sumätöfan jü deadam, si! jü deadam len krod.
Sekü atos God mu elöpükom omi, ed egivom ome nemi, kel binon löpikum ka nems votik valik,
dat pö lüvok nema omik kiens paflegons alutanas, kels binons in süls, su taled e dis taled,
e dat lineg alik lekoefon, ad glor Goda: Fat, das Yesus: Kristus binom Söl.
Klu, o palöfölans obik! Äsä ai binols lobediks, no te pö kom oba, ab igo nog mödikumo pö nekom oba, vobädolsöd ko dred e drem beati lönik olsik!
Ibä God binom utan, kel vobedom in ols, fe ed ad vilön ed ad vobön, dat plitolsös omi!
Dunolsös vali nen mur e nen vätäl!
dat binolsös neblamabiks e kliniks, as cils nendodik Goda zänodü menäd neveratik e tanatik, in kel nidolsös äsä lits in volanef!
bi laidälols pö lifavöd, demü kelos pleidülob ün del Kristusa, e bi no edunob ed etöbidob vaniko.
Ed üf pö sakrif e kult lekreda olsik, blud obik pagifonöv, ob fredoböv, si! fredoböv ko ols valik.
Fredolsöd i ols demü atos, fredolsöd ko ob!
Konfidü Söl: Yesus, spelob ad lesedön suno eli ‚Timotheus‛ lü ols, dat i ob pokuradükobös, ven ogetob nunis de ols!
Ibä labob neki, kel baicedom ko ols, ed okälälom so fiediko demädis olsik, äsä omi.
Ibä valans demons dinis lönik oksik, e no utis Yesusa: Kristus.
Sevols konfidovi omik, pö predam gospula eyufom obi, äsä cil fati okik.
Spelob kludo ad lesedön omi, sosus osevob fümiko vio stad obik obinon.
Nu konfidob Söli, das i ob it okömob suniko.
Ecedob osi zesüdiki ad lesedön lü ols eli ‚Epaphroditus‛: hisvistan, kevoban ä kekomipan obik, lesedäbi olsik ä kultihidünani, keli äneodob,
bi ädesirom vemo lü ols valik; äbinom vemo netakedik, bi elilols, das äbinom malädik.
Ed ebinom i malädik, nilü deadam; ab God emiserom omi, e no te omi, abi obi, dat no ölabob liedi pos lied.
Sekü atos elesedob plüo sunikumo omi, dat fredolsös ad logön omi dönu e dat ob binobös nenkudik!
Getedolsöd kluo ko fred gretikün omi in Söl, e labolsöd laido stimi pro somans!
Ibä sekü vobod Kristusa ereafom ini deadariskäd; eriskom lifi okik, pö läfulükam utosa, kelosi enedunols pö kultidün lü ob.

KAPIT: III

Fovo, o svists obik! fredolsöd in Söl! Ad penön oles otosi no binos neplitik lü ob, ed oles atos gevon fümi.
Küpälolsöd ad dogs! küpälolsöd ad vobans badik! küpälolsöd ad säprepüdam no voik!
Ibä obs binobs säprepüdäbs voik, kels dub Lanal Goda dünobs omi e pleidülobs demü Kristus: Yesus, e no stutobs su buamagitods plödik,
do ob labob buamagitodis plödik somik. If ek cedonöv, das kanonöv konfidön buamagitodis okik, tän ob kanob dunön atosi ön mafäd mödikum.
Pesäprepüdob tü del jölid; licinob se Yisraelän, se tribüt di ‚Benjamin‛; binob rigao hebreyan; ma lonem farisetan;
tefü relazil, ebinob pöjutan komota; e tefü gid ma lonem neblamabik.
Ab alutosi, kelos äbinon frutik lü ob, elecedob bosi dämüköl demü Kristus.
Si! lecedob fümiko vali dämüköli leigodü süper seva Kristusa Yesus, Söl obik. Demü om elecedob vali bosi dämüköl, mioti, if ob te dalob gaenön Kristusi,
e patuvobös, das dutob lü om, e das no dunob ma gid lönik sekü lonem, ab ma gid sekü lekred in Kristus, fa God ebo demü lekred pegevöl.
So seivobös omi, nämi lelifikama omik, kobädi sufa omik, e labobös deadami sümik,
dat bo oreafobös ad lelifikam se deadam!
No binos, das ya erivob atosi, u das ya perafinükob, ab steifob ad dagetön osi, bi i pegleipob fa Kristus.
O svists! ob no cedob, das ya egleipob osi;
ab dini bal dunob: glömob utosi, kel epasetikon, lüälob lü utos, kel binon fo ob, dayagob zeili ad dagetön premi sülik dub vok Goda in Kristus: Yesus pelonülöli.
Tikobsöd so, maä udagetobs süeni! If nu tikolsöv votiko dö din seimik, tän God osevädükom osi oles.
Alo, kondötobsöd e tikobsöd ma utos, ad kel ekömobs!
Binolsöd züpans oba! o svists! e logolsöd lü utans, kels kondötons ma sam, keli labols de obs!
Ibä mödikans, binos bos, keli esagob suvo oles, e sagob drenölo i nu, kondötons as neflens kroda Kristusa.
Ab fin onas obinon päridikam; bälid binon god onas; jemod binon stim onas, e tikons te dö dins taledik.
Lomän obsik ga sül binon, se kel spetobs as savan Söli: Yesus Kristus,
kel oceinom koapi läsöfik obsik ad somik, kel sümon ko koap glorik omik, dub näm, me kel fägom ad sumätükön vali.

KAPIT: IV

Klu, o svists palöföl ä padesiröls oba! fred ä kron oba! laidälolsöd so in Söl! o palöfölans!
Stigädob eli ‚Evodia‛ ed eli ‚Syntyche‛ ad binön baläliks in Söl.
Si! obegob ole, o flenädan fiedik! yufolöd ofis. Ofs ga eyufofs obi pö predam gospula ko ‚Clemens‛ e kevobans votik, kelas nems pepenetons ini buk lifa.
Fredolsöd ai in Söl! dönuob: fredolsöd!
Sufäl olsik sevädonös pö mens valik! Söl binom nilik.
No kudolsöd! ab sevädükolsöd utosi valik, kelosi begols, ai me plek e lebeg ko danisag Gode!
e püd Goda, kel pluon leigodü täläkt valik, okipedon ladälis e tikodis valikis olas in Kristus: Yesus.
Fino, o svists! kelos binon veratik, stimabik, gidik, klinik, löfidik, benorepütik, tugöfik, lobabik: betikolsöd atosi valik!
Kelosi elärnols, ed elüsumols, ed elogols in ob, dunolsöd atosi! e God püda obinom lä ols.
E fredob vemo in Söl, das ebetikols dönu seimna obi, sevabo: ebetikols sio obi, ab no elabols pöti.
No sagob atosi, bi defädob; ibä obo, elärnob ad binön kotenik pö dinäds valik.
Sevob ad lifön mükiko, ed i in bundan. Eplakob vali e dinis valasotik, ed esevob sati, ed esevob faemi, ed ejuitob bundani, ed esufob defädi.
Fägob ad sufön vali dub om, kel nämükom obi.
Ab edunols gudiko ad jonülön obe kesenäli, ven pädränälob.
Ols it, o els di ‚Philippi‛! sevols, das ün prim predama gospula, ven ädetävob se Makedonän, plä ols, komot nonik äyumäton ko ob tefü giv e get.
Ibä ya in Tesalän esedols obe telna bosi demü neod obik.
Pö atos no zeilob givoti, ab zeilob fruti, kel kömon bundano ini kal olsik.
Egetob nu vali, e labob bundani. Dalabob bundano, nü egetob dub ‚Epaphroditus‛ uti, keli esedols, as smel löfidik, as sakrifot Godi plitöl.
Ab God obik ofölom bundaniko neodis valik olas, ma lieg okik dub glor in Kristus: Yesus.
Lü God ä Fat obsik glor binonöd ün laidüp valik! So binosös!
Glidolsöd saludanis valik in Kristus: Yesus! Olis svists valik glidons, kels binons lä ob.
Saludans valik glidons olis, pato utans, kels dutons lü kur lampörik.
Benäd Söla: Yesus Kristus binonöd ko lan olsik! So binosös!

(At pepenon elanes di ‚Philippi‛ in ‚Roma‛ fa ‚Epaphroditus‛)

---------- oOo ----------

Ninädalised