Pened hiela H. Guigues gasede: Volapükabled Tälik 1

Volapük in Flentän: Kopanals volapükakluba flentik plo pakam volapüka okokömoms, 15^id de amulo, in topöp kluba de nügenels (10 Citè Rougement) in Paris, al sedilön peloreles könadis de steifalam valemik de mälul 5^id yela büfik. Bisiedel, söl Lourdelet, opükatom dö zil, ledul e kapäl volapükelas valik e lepenädan söl Kerckhoffs, na ukalügom kudadinis kluba, opükatom i dö mosteps epakam volapüka in Flentän e in Selän.

Balul 21^id, klub obsik olofom, kopanales okik e gasedeles valik flentik, glefidi in staud gletik in Paris. Volapükels oblodoms ko gasedels e ogivoms ates nünis kuladik dö pakam püka obsik. Gasedels, kels binoms ya flens obas, openoms, in bleds okas rezipik, laltügis gönü pük valemik e tedelik. Pos dels anik, os binos balul 29^id, obeginobs, in Paris, tidüpis maniföfik e glatik volapüka.

Tidüps kil balid ozitoms in tidastid tedelik, in konsälöp S. Sulpice e in kadem bukamava; tidüps at potidoms fa söls Kerckhoffs, Roussey e Guigues.

Tidüps maniföfik e glatik zitoms ya in zifs valik de Flentän e lepato in Bordeaux, La Rochelle, Marseille, S. Maurice, Poutoise... e l.

Sosus okanob osi, ogivob ole nünis kuladikum dö koköm glefid e tidüps obsik in Paris.

Sevälef xamas in Paris egevom dipedi de plofed volapüka läde de Nècrassoff in Tiflis (Lusän) e söle Oreglia d'Isola in Torino (Tälän). Aikel vilom dagetön dipedi volapüka mütom vedön kopanal kluba obsik, penön penoti de flans bals za e etidön volapüki du yel bal luüno in net oka.

Paris, 1888 1^ul, 3^id.

GUIGUES.

Se Volapükabled Tälik 1888, Nüm: 1, Pad: 7.