Pened hiela J. Holden gasede: Volapük (Guadalajara) 1
NELIJ, Fulwood Preston, mälul 12, 1887.
Egetöl penedis de volapükels foginik desidöl nunis dö Limepän britik, openob laltügis nelonedik an tefü kinän pebalöl de Gletabritän e Rilän, regam, monafüns, militanäms, dustods, ted, musams, e julasit en, if söl redakel bleda at binom-la vilölik gevön spadi oma völadik al ninsädön omis.
Gletabritän e Rilän binoms nisuls smalik tel in mel Atlantik, ed in Yulop vesüdik; ab lenu no opükob fälo dö nisul glünik Rilän, sod osagob bosi en in pened patik.
Gletabritän, kel ninom Neliji, Jotläni e Valisäni, binom nisul de loned leilas 580, e de vied dukötik za 155, e klu labom valeilis za 90.000, ko netam za 30.000.000.
Netam de Jotlän binom 3.734.500, e de Valisän 1.360.000 e klu dil gletikün netama sibinom in Nelij; rilänels lemödik lödoms in Nelij, Jotlän, e Valisän; num selänelas binom za 170.000, de kels 130.000 lödoms in London, glezif de Limepän britik. Netam de London binom 4.530.000.
Blud nelijela ninom bludi dänik, deutik, flentik, nedänik, novegik, svedik, e dilis smalik netas yulopik votik; sodas nelijel pejafom de stöf legudik, ed aisenom das mens netas yulopik aibinoms blodem oma, e mens pemoyagöl de fataläns divik omas egelo tuvoms lüfugapladi e lomi nulik e sefik, su glun britik; stip soalik kel pademanom de oms binom das aiködotoms segun lons fataläna nulik omas.
In län nonik tala binom pop dutälikum ka in Gletabritän; fablüdens bidas valik sibinoms in nums leo gletikum ka kanon bepenön; cans e fablüdads paifablüdoms in möds velato ne suemik, in golüd, silef, koped, dülin, lel, tin, tain, kotin, e l.
Sibinoms sebs leliegik de kolat, lel, plum, e de mins völadik votik.
Fels paikulivoms al blinön limödöfis mögiküno gletik de yeb, glen, pötets, glünads, flols, e fluks; jevals, kuns e nims pöfüdik votik aibundanoms; e fits paifanoms in möds vemo gletik.
Dido nisul smalik at pailäbadom fa Jafal, ab liedo me steifs valik boas no kanobs nulüdön lafi netama; e klu mutobs ninpolön limödöfis leo gletik zibas de bids valik se läns votik nilik e fagik, ab, dans len God, binobs mens libik e labobs tedi libik ko nets tala lölik! Ko jelam pop obas ädalebomöv, e lesuno äzitomöv volut. God jelomös obis de voluts e misals en!
Se Volapük: Gased bevünetik tedelik, nolik, literatik e gälodik 1887, Nüm: 9, Pads: 85-87.