Pened hiela L. Zamponi gasede: Volapük (Boston) 1

Graz (Stirän), 1889, kilul 10id.

Söl palestimöl!

Dalob obe nunön oli, das klub isik vpa estitamom gletasami^[1] plo yel at - balul 28id y a. - in söl ledik standa^[2] “Ressource.”

Lömän kluba, söl Devide, ebeglidom ed edanon demü pubön mödik omsik.

Söl Wessely ebililadom plotogi gelelasama^[3] äyelik, söl Schachermayr epükatom dö vobadön kluba in luba yel efegolöl, e kädan, söl Rosenstein, ebililadom käda nunodi.

Söls suköls peväloms as sevälem kluba plo yel 1889, efe:

Devide August (jäfadukel fiama: “Bloden Thonet”) as löman (cif), Zamponi Ludwig (liötanel k. b.) as pladal lömana. Schachermayr Theodor (calel plivaadik^[4] as penädan, Rosenstein Franz (jäfadukel bukatedama Styria) as kädan, fälo as kopanals sevälema ed as güvamans, söls: Antoine Karl, Keil Theodor, Ninold Franz, Schmid de Schmidsfelden Hunrich, Vaczulik Josef, Wessely Edward, Wild Karl e Zamponi Raimund.

Zamponi Ludwig edlinapetom su datuval ledivikum, söli^[5] Schleyer; dlinapetel esepükom gäli gletik oma, das nun dö deil söla Schleyer, keli gaseds mödik eblinoms äyleo, ebiuom^[6] nevelatik, ed ejötom ko vip känüdik das söl Schleyer lifomös nog lonedo in saun al gäl züpelas lemödik oma.

Söl Wessely edlinapetom balüdo su stabel kluba obsik, söli^[5] Schachermayr, e tan su läds plisenik.

Fin glelasama ezitom al düp balsedaläd e lafik neito.

Klub isik vpa beglidom ladliküno klubis vpk valik sibinölis e volapükanis dabalik, ed ogälokom, if ats ospodoms flenügiko kol om dö kudadins vpa.

Begob ladliküno oli, nunolös plidiküno pöto obi dö mosteps vpa (num e zifs klubas e.l.) in län olik.

Ko glids gudikün disopenob lestümafuliko

D.O.D.

ZAMPONI LUDWIG

Graz (Österreich) (Löstän) Marschallgasse 5.
Klub isik vpa labom kopanalis 55.

NOETS. (Vükifonät)

1. Bükapök; pla: glelasami.
2. Jiniko bükapök; pla: stauda.
3. Bükapök; pla: glelasama.
4. Bükapök; pla: plivadik.
5. Bükapök; pla: söl.
6. Bükapök; pla: ebinom.

Se Volapük: Gasedil mulik püka bevünetik 1889, Nüm: 11, Pads: 105-106.