Pened hiela P. Champ-Rigot gasede: Nunal 1
Saint-Maurice Seine. - Segun vip olik, pesepetöl obe fa söl Guigues e ol it, potob ole nunis blefik dö Kongef e begob oli sekusadön obi if, kodü def tima, no kanob penön ole lonedikumo.
Kongef bevünetik de Paris eblöfom leo e plobo das vpans tala lölik balamoms. Sluds, pos bepükam püdik e flenik, ab fefik, pelensumoms bavögiko. Sluds at binoms: I.o Statuds Kadema pelonoms segun ployeg (ko vots mödumik). - II.o Ployeg glamata nomik söla Kerckhoffs poxämom fa Kadem kel olonom.
Sek votik sembal Kongefa, kel no pivalädom fa mödiks bevü obs, binom das volapük, aikiom sepükom omi, binom lekapälnik plo valiks. Dif sepükamas binom neveütik. Bepükam Kongefa pemekoms vpo, e ven Kongefal sembal äpükom püki okik, lasamef äsagom foviko: « Pükolös vpo! »
Volapük sibinom desnu äs pük lifik, äs pük pepüköl e elabob gälodi lilön söli Karl Lenze om it, redakel de Interpretor, pükön vpi legudik e blöfön, dub atos, das no binos zesüdik sukön püki lekanik votik.
Volapük lifomös!
Se Nunal 1889, Nüm: 5, Pad: 5.