Pened hiela R. Kniele gasede: Volapük (Guadalajara) 1
WÜRTEMBERG. - Stuttgart. - Mayul 7, 1887.
Lasam valikodik Kluba vürtembergik ezitom mayul balid e teloid m. a. in glezif Stuttgart. Lasam at älabom veüti patik dub plisen söla datuval. Sälun lasama äbinom pedeköl ko festuns e ninpenäds; löpü yan ningola ästalom ninpenäd at: «Vekömüni datikele volapüka!» Begin lasama äbinom düp vel vendelo, sälun äbinom pefulöl lefulnik ko lilels clas e kladas difik, bevü kels i läds mödikum äbinofs. Söl Heintzeler, cif Kluba in Stuttgart äbeginom lasami ko glid vekömöl len söli Schleyer. Poso Kniele, cifel vpaklubas saik in Würtemberg, äpukatom dö mosteps volapüka in ninlän e selän.
Pos at söl dokel Müller, rekel in Calw äpükatom dö döl e zeil volapüka ed ätablöfom smatapükis difik ta mög püka kanik e pato ta mög nindukama volapüka. FIno söl Schleyer, pebeglidöl tlepiko fa lasam, äpükom vödis nemödik dö datuv oma, e, yümöl len zäli motöfadela yeltumsik poedela Uhland, kel pizälom bü dels anik in Stuttgart, älesagom, das volapük, dido bu valikos tedapük, i pötom-la legudik plo poed.
Ko läsevs gletik e ko «lifö» tötöl lasam pejötom.
In del telid, mundel, äbeginom lasam düp zül gödelo, kel äbinom paköseköl dile jäflik. Cifel Kniele äliladom nunodi dunöfa kluba ünü yel efegolöl. Klub labom kopanalis kiltum vel e nebaklubis bals. Ninsums äsuämoms makis 512, segivs makis 378, alos kömoms nog zöts labema d emaks 160, klu labem kluba binom maks 294. Sis yels tel segun slud yelo maks jöls pägeseitoms diseinü sedam deputala al lasami in Paris. Tefü pün at päsludos, das maks jöls at sötoms pagebön ayelo al mesedam deputalas kil al lasami in München.
Äsukoms nog bepükams tefü mobs e sluds veütikün lasama münchenik pato tefü fomam Kadema, kel no lonedumo kanom pafezogön. Pos zendelafid, du kel cifel Kniele ädlinapetom volapüko su datuval välöfik, kela stad saunik nu binom legudik, kelos ägälos levemo flenis omik, söl Schleyer e sevedikels valik ämovegoms ko lelodazugs.
Dels Stuttgarta äbinoms gälik ed obinoms pöfüdik dine obsik.
Kniele.
Se Volapük: Gased bevünetik tedelik, nolik, literatik e gälodik 1887, Nüm: 6, Pads: 57-58.