Pened hiela W. Rosenberger gasede: Volapükabled Tälik 2
Mütob beginön penedi obik me sekusad, bi ya lonedo no epenob ole, tos egetob de ol sedotis anik divik, a.s: glamati tälik ola, pötü kel benovipob tälelis valik. Danünö plo sedam oma! Danö i plo bled olik, kela egetob nümis pepüböl. Eko läpol plo bled, kel onitedom rusänelis valik jäföl vpi:
Eplöpos obe rivön seki gletik tefü pakam vpa in Rusän:
Hitatimo yela 1887, kü ifinob tidüpi balid vpik oba e sikodo num timapenädas vpik pebonedöl in Rusän eglofom boso, xaimolöpef rusänik esenitom zidi at. No kapälöl nini timapenädas e dledöl, das nuns ba pöligik paninsedoms in län dub timapenäds at (pato eseniton Cogabledi), xaimalöpef esludom bemiedön numi timapenädas kömöl is; somo tüp ikömom, kü bonedel alik ägetom pebonedölosi te sukü begapenäd patik e ebegapenädöl alik edagetom däli patik; begapenäd somik äkostom ruabi bal e kopekis 60. Ab suno, pos finam tidüpa telid obik (komü pösöds 70) num begapenädölas eglofom nog, sodas ecedon as nemögik gevön däli patik so mödikes - e bonedels mödik ebliboms nen bleds pevipöl e pebonedöl. Logöl neletübi vemik pakama vpa in stad fätik at e sevöl nini nebolitik timapenädas vpik eblüfob dugön seniti xaimasöga isik al dinad at me penod gletikum, in kel elüjonob zeilis e paki nuik vpa e nini timapenädas vpik, ed elofob dünis glatik oba ainunodön alina caliko dö nin omas. - Sög peterburgik xaima selänik (glexaimasög Rusäna) no ebestimom obi, as pösod plivadik, dub konfid oka, sod etuvom meid nog balikum e plagikum panunön caliko dö nin timapenädas: ekomitom xaimeli lenadön vpi. At, söl Sankóv, as steifal pükava elenadöl vpi levifiko e ya egetöl dipedi tidelik des nu oililädom caliko valikis bükadinis vpik. Bükadin balid pedälöl caliko fa xaimasög binom “Kaled vpelas„ plo yel 1888 fa Gross in München, telid “Magabuk nen mags„ de Andersen pelovepolöl fa Lederer. Ädelo, danöl plo dalilam flenikün, elilob de söl lexaimel it, das no plu zesüdos begapenädön al oigetön timapenädis vpik in Rusän. Gälos obi vemo, das eplöpos obe dunön düni at vpeles rusänik e redakes timapenädas vpik.
Äs elogob, samads anik bleda divik ola seistoms in xaimöp; nu polilädoms e, bi ninoms nosi pöligik, posedoms segun ladets omas.
- St. Peterburg, 1888, 3ul 28id
Se Volapükabled Tälik 1888, Nüm: 6, Pad: 45.