Pitla Storia bibia/16

Ujep vën inò auzà.

Do doi ani s'à nce l rë semià zeche. L ti univa dant de vester dlongia l ruf Nil. Set vaces bela grasses univa ora dal'ega y jiva a pastura sun ëur de ruf. Do univa po' set burta vaces megres y maiova su la bela vaces grasses. Te chëla s'à l rë descedà. L s'à po' inò ndurmenzà y s'à semià zeche d'auter. L chersciova sun n stram set spies, bela plëines de graniei. Po' univel set spies vuetes y sëces docà y maiova la set spies plëines de graniei. Te chëla se à Faraon inò descedà. Da duman al fat cherdé duc i Magi dl Egit y i à cuntà, cie che l se ova semià.

Ma l ne n fova degun danter ite, che savova da ti splighé, cie che significhea chël che l se ova semià.

Śën permò se à, chël che jetova ite l vin al rë, recurdà d'Ujep y à dit: "Te perjon iel n jëun, che ova sapù ntlëuta, canche ie y chël che ve fajova l pan fan te perjon, da nes splighé drët bën, cie che se an semià." L rë po' à fat jì a dò Ujep y i à cuntà la doi cosses, che l se ova semià.

Y Ujep à respundù: "La set vaces grasses y la set spies plëines de graniei senifichea set ani d'abundanza. La set vaces megres y la set spies sëces alincontra senifichea set ani de ciarestia. Iló uniral na gran fam. Davia de chël cële l rë de se giapé n uem sapient. Chësc uem dëssa cumandé, che chël che resta sëurora dla racolta ti set ani d'abundanza, vënie jetà tl'erces per i set ani dala fam.

Chësc cunsëi ti plajova drët scialdi a Faraon. Ël à dit a Ujep: "Pudëssi pa ie bën giaté n uem, che sibe plu acort che tu? Cëla, ie te mëte té su a cumandé sëura dut l'Egit y a ti cumando dëssa fé al sënn dut l popul."

Po' à Faraon tëut la varëta ora de si man y l'à tucëda tl dëit a Ujep y ntëur l col ti al tacà na ciadinela de or. Po' àl cumandà de mené Ujep ncantëur n cales y che ti sveie ora. "Jenudlëve ju dant a Ujep, pervia che ël ie metù su a cumandé sëura dut l'Egit!"

"Chërdeme tl di dla tribulazion, ie ue te delibré."