Pitla Storia bibia/18

I fredesc va segondo iede tl Egit.

La blava d'Egit fova maieda su duta canta y mo for durova la fam. Davia de chël à dit Giacobe a si mutons: "Mé jide inò a cumpré ite blava!" Giuda à po' respundù: "Chël uem à dit: Zënza vosc fra plu jëun ne daussëis plu me unì dant ai uedli! Lascia perchël unì l mut cun nëus, acioche ne messons murì. Ie ue sté bon per ël."

Finalmënter à dit si pere: "Sce l muessa propi vester, fajëde mefun, coche ulëis. Tulëde pea velch doni per chël uem y mo n tan de scioldi che l prim iede; po' tulëde mo chëi scioldi pea, che ëise giapà ti sac sëura la blava via. Chël Bel Die uniputënt dëssa fé, che chël uem ve tole su bën, che l lasce unì cun vo vosc fra, che ie te perjon y ntant sté tlo bel sëul sulënt y zënza mutons!

I fredesc à inò abù fertuna y ie ruvei tl Egit. Canche Ujep à udù si fra plu jëun, al cumandà a si gran fant de cësa y à dit: "Mëina ite chësta jënt, ëi dëssa unì a marënda cun mé!" L gran fant de cësa à fat, sche l ti fova cumandà. Po' al nce menà Simeon pra d'ëi. Prësc do ie unì Ujep. I fredesc s'à nchinà ju a tiera y ti à cunsenià i doni. Ujep i à po' saludei drët da amich y à damandà: "Viv pa mo vosc vedl pere? Iel pa san y nton?"

I fredesc à respundù: "Nosc pere, ti fant, viv mo y ie san y nton." Canche Ujep à udù Beniamin, àl dit: "Ie pa chësc vosc fra plu jëun? Idie te benedësce mi fi!" Y debota se n ie Ujep jit ora y à scumencià a bradlé, pervia che l cuer i jiva per sëura a udëi si pitl fra.

Po' s'à Ujep lavà ju l mus, ie inò unì ite y à dit: "Purtëde su da maië!" Pra mëisa po' ie i fredesc unii sentei ju uniun do si età. De chësc se fajovi drët marueia. Ëi maiova y buvova y fova de bona ueia.