Pitla Storia bibia/24

24. I Israelic maza l'aniel pascual y se n va ora dl Egit.

Mojé y Aron à abinà lpopul d'Israel adum y à dit: "Nscila cumanda lSeniëur: Ai catordesc de chësc mëns dëssa uni patron de cësa sula sëira mazé n aniel zënza defet, ma lcële de ne i rumpì degun os. Cul sanch dëssel ntënjer l lim d'usc. La prata de chësc aniel dëssi maië aslune mo n chëla sëira y leprò pan nia da levà.

Pervia che n chëla nuet uei ie fé passé mi angiul per l Egit a mazé uni primogenitura de chëi dl Egit. Ma ulache ie uderé lsanch sun vosta cësa, passerei via."

La sëira di catordesc ie unida y i Israelic à fat, sche Idie ova cumandà. Da mesanuet à Idie mazà uni primogenitura d'Egit dal primogenito de Faraon nfina ju al primogenito de chël che va a ëures, nce uni primogenitura dl bestiam.

Te dut l Egit fajovi n gran lamentamënt; jache ne fova inió na cësa, ulache ne fossa stat n mort. Mo de nuet à Faraon fat cherdé Mojé y Aron y à dit ad ëi: "Jivene pu mé, jivene, cun dut vosc popul y benedime!"

Śën po' ie i Israelic muec a se n jì cun duta canta si roba. Y Mojé à dit ad ëi: "Chësc di dëise vo tenì festa da generazion n generazion."