Pitla Storia bibia/26

26: I miraculi tl desert.

Dal mer cueciun ie i Israelic jic inant y ie ruvei tl desert. Iló ne n'ovi plu no cërn no pan da maië. Davia de chël fovi melcuntënc y bruntlova. Ma Chël Bel Die à dit: "Da sëira maierëis cërn y da duman ve maierëis pasciui de pan."

Eco da sëira julovel adalerch n grumon de catores. I se à lascià ju via per tiera, che n pudova saurì i pië. Da duman po' fova l desert curì cun de pitli graniei blanc sche la bruma. A chësc pan ti dijovi mana. La sëur de chësc pan fova dëucia sche pan duncà tla miel. Cun chësc pan à Chël Bel Die mantenì i Israelic carant'ani; alalongia, nchina che i ie ruvei te Canaan.

Curt tëmp do chësc miracul fova i Israelic ruvei te n'autra pert dl desert. Iló n'ovi deguna ega. I bruntlova cun Mojé. Ma Chël Bel Die à dit a Mojé: "Tue ti fust tla man, va sul mont d'Oreb y pëta tl crëp, po' uniral ora ega." Mojé à fat nscila. Te chël mumënt che l à abù petà tl crëp, iel nasciù na gran funtana d'ega, nsci che la jënt y l bestiam se n pudova bëiber assé.