Pitla Storia bibia/N38

La Dlieja de Gejù Crist vën sparpaniëda ora.

Do la festa de Pasca de Mei à scumencià i apostuli a jì per l mond a perdiché la fede y la dutrina de Gejù Crist ai Giudieres y ai Pagans. N inuem de Gejù fajova i apostuli nce truep miraculi. Cun chisc miraculi dajova Chël Bel Die testemunianza che la dutrina perdicheda dai apostuli ie la drëta. L numer de chëi, che cherdova a Gejù, univa for majer y majer y nscila se sparpaniova ora la Dlieja de Gejù for plu y plu. I apostuli ne la fajova plu a jì dlonch a perdiché. Davia de chël cunsacrovi vësculi y prevesc.

L majer de duc chëi, che ova da cumandé tla Dlieja fova Piere, che ie unit metù su da Gejù Crist nstës per l majer paster de duc. L suzessëur de san Piere ie l Papa da Roma. I suzessëures di autri apostuli ie i Vësculi. I fanc di Vësculi ie i prevesc.

Nsci sta la santa Dlieja catolica y apostolica bele da cuaji 1900 ani y la durerà mo fort, nchina che vën inò l devin Salvator Gejù Crist, che l à nstituida, a giudiché i vives y i morc. "Chi che scota su a vo, scota su a mi, y chi che desprezea vo, chël me despreza mé."