Pleitu ente Uviéu y Merida

by Antón de Marirreguera

Pleitu ente Uviéu y Merida  (1887)  by Antón de Marirreguera

Cuando examen les abeyes
Y posen de flor en flor ,
Si les escurren s' espanten,
Vanse y non facen llabor ,
Dexando el caxello vieyo
Pa buscar otro meyor.
Sant' Olalla fó l' abeya
Que de Mérida ensamó ,
Enfadada q' adorasen
Les fegures de llatón.
Entoncies el rey Don Sil
Andaba en guerra feroz
Con los moros que querín
Encabezase en Lleón .
Permitiólo aquesta Santa
Que les victories i dió ,
Matanza faciendo n' ellos
Fasta q' en Mérida entró .
Llegó al pueblo d' esta ñeña
Que temblaba de pavor ,
Y esconfiaba de so cutre
Solliviada de temor .
Cutieron los santos güesos
Viendo que s' arrodiyó :
Si estovieren más carnudos
Saldrín fei acatación .
Trúxoles el Rey piadosu,
De llaceria los sacó
Y metiólos per Uviedo
Con gaites y procesión .
Mérida diz que i tornen
Esta prenda que i faltó :
Diga ella que quier ise
Y aún con eso... quiera Dios .
Si quieren que la llarguemos ,
Páguennos la devoción
Ansí de los que finaron
Como de los q' ora son .
Díguenlo al Santo Sudario
Ver quicias si da razón ,
Pos non tien utro cuidado
El señor San Salvador.
¿Quián ora i lo mandará?
Bien s' echa de ver que nos:
Si nos lleven esta Santa
No hay más d' arrimar la foz ;
Dirán ellos: - " Morrió acá " ;
Diremos nos : - "Non morrió ,
Q' está viva par' Asturies ,.
Si está muerta para vos" .
Y anque la lleven , m' obligo
Que se torna per ú fó ,
Porque dexa conocidos
Y gran comunicación .
Si por amor d' esta Santa
Extremadura llibró,
El Prencipado heredero
Puede ir tomar posesión .
Ella está muy bien acá ,
L' otro vaya per ú fó ,
Porque están de nuestro llado
L' Obispo y Gobernador .
Nosotros los de capote ,
Cual con un ral , cual con dos ,
Seguiremos isti pleito
Fasta llevállo ente Dios .