Preghiera veggia
Gioann Bertacch (1869-1942)
Preghiera veggia
Me regordi de fiœu, quand a la sira
recitavom in cà la terza part,
adree a la vos de la mia bona mam:
che se diseva su n'Avemaria
per tutt'i viandant, per i malaa
e per i tribolaa d'ogni manera.
Mì vedevi passà 'sta litania
de creatur in ombra, a vuna a vuna,
con la soa fed e con la soa fortuna,
propi come se canta in la preghiera:
- Ad te clamamus exules... - che, inscì,
ripetuda quai volt al dì che mœur,
la se trasforma in ona vall del cœur.