[ 183 ]
La 9a aprilo la du Idista societi di ca urbo (Internaciona Linguo Klubo, e Virinal Uniono por la Linguo internaciona helpanta) aranjis kunveno publika. Prof. O. Jespersen parolis unesma, expozis la historyo di la problemo, l’avantaji e difekti di Volapük e di Esperanto, fine la strukturo e qualesi di Ido ; il dicis, ke ldo facis plu multa progresi en 12 monati kam Esperanto en 12 yari. Pose, Prof. Kock, de l’Universitato di Lund (Suedo) diskursis kun entuziasmo pri Ido, qua konvertis ilu a l’ideo di LI., pri qua il esis ante skeptika ; ed il montris, ke l’adopto di LI. esus granda progreso di la civilizeso. Parolis anke So chef-medicinisto Ottosen e Do Forchhammer, prezidanto di l’Internaciona Linguo Klubo. Kelka objektanti sucesis nur konfirmar la favoro di la publiko por nia eloquenta advokati. Asistis a ta kunveno, inter altra eminenti, So Fr. Bajer, Nobel-premyizito di la paco, e So Hagemann, direktisto di la politeknikala lernego.
L’impreso produktita da ta kunveno semblas esir granda e [ 184 ]bonega. Multa jurnali raportis pri ol : Politiken, National-Tidende, Dagens-Nyheder, Köbenhavns Kommunskole, Agitatoren, Dannebrog ; ta artikli sive esas simpatioza, sive agnoskas adminime, ke problemo protektata da tala e tanta autoritati meritas serioza exameno. En Ekstrabladet (11 aprilo) aparis artiklo malfavoroza a la LI., cetere vulgara ed insultema, en qua on questionis, kad la linguisti ne refutos So Jespersen. To genitis polemiko, quan partoprenis Si Gjerulff e Birkedahl. Li citis la stranjera linguisti, qui anke favoras la LI. ; li refutis la fanfaronadi di l’Esperantisti, qui asertas havar 1 1/2 milion adheranti e 137 revui (!), e montris ke Esperanto vere vivas, progresas e florifas, nam ol parturis… Ido. — Rezume, granda suceso por nia entraprezo ; quale konkluzas Dannebrog, « Ido agitas la menti ».