[ 189 ] Le Jour (Verviers, 17 marto) insertis artiklo da H. Angenot, qua explikas tre bone per quo la LI. (Ido) esas nekompareble plu facila, do plu difuzebla, kam irga nacionala linguo, ex. la franca. Ol povas lernesar e praktikesar sat korekte mem da min instruktiti, qui nultempe povos lernar suficante e decante ula vivanta linguo. — La sama jurnalo publikigas omna merkurdio lecioni pri Ido.
Le Jour (Verviers, 1 aprilo) publikigis tre forta artiklo da H. Angenot : Kad on povas esar Esperantisto ? De la linguistikal vid-punto, on ne povas esar Esperantisto, pro l’evidenta supereso di Ido. Ton agnoskas fakte l’Esperantisti ; e li « restas fidela » nur pro sentimentala motivi, pro l’ « interna ideo ». Or quo esas l’interna ideo ? Ula metafizika o religya doktrino, quan Dro Zamenhof volis propagar en la mondo per Esperanto. Nur to povas explikar la pseudo-religyala karaktero di l’ « Esperantismo », di la « netuchebleso », e la fanatikeso di la « fideluloj ». Sed irge quante respektinda esas ta doktrino o tendenco, la LI. ne povas esar ligita ad ula aparta sistemo, e la sama motivo, pro qua l’Esperantisti adheras ad Esp., impedos sempre la libera e senpartia spiriti adherar ad ol. Yen pro quo la vera partiani di la LI. ne povas esar Esperantisti. Li bezonas linguo helpanta, e ne irga kredo ligita ad ol : e li postulas la max bona linguo. Yen pro quo li adheras e adheros sempre plu ad Ido.
Le Jour (Verviers, 11 aprilo) insertis en sa unesma kolono artiklo pri la LI. e Ido, da H. Angenot, qua komparas Ido kun Esp. e montras, ke nia linguo difuzesas plu rapide kam sa superba konkuranto.